ព្រះករុណា ព្រះមហាក្សត្រ រាជានុញ្ញាតលោកជំទាវប្រធានាធិបតី និងឯកឧត្តមនាយករដ្ឋមន្ត្រីឥណ្ឌា ចូលគាល់ នៅទីក្រុងញូវដេលី

ញូវដេលី ថ្ងៃទី៣១ ខែឧសភា ឆ្នាំ២០២៣ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គសព្វព្រះរាជហឫទ័យ រាជានុញ្ញាតលោកជំទាវ ដ្រៅផាឌី មូរមូ (Droupadi Murmu) ប្រធានាធិបតី និងឯកឧត្តម ណារិនដ្រា ម៉ូឌី (Narendra Modi) នាយករដ្ឋមន្ត្រី នៃសាធារណរដ្ឋឥណ្ឌា ចូលគាល់ នារសៀលថ្ងៃទី៣០ ខែឧសភា ឆ្នាំ២០២៣ នៅទីក្រុងញូវដែលី ក្នុងឱកាសដែលព្រះអង្គទ្រង់គង់ប្រថាប់បំពេញព្រះរាជទស្សនកិច្ចផ្លូវរដ្ឋ នៅសាធារណរដ្ឋឥណ្ឌា ចាប់ពីថ្ងៃទី២៩ ដល់ថ្ងៃទី៣១ ខែឧសភា ឆ្នាំ២០២៣។

រូបថត៖ Royal du Cambodge

(សូមអានបន្ត)

រដ្ឋមន្ដ្រីសុខាភិបាល បំពាក់គ្រឿងឥស្សរិយយស ជូនអ្នកជំនាញការបច្ចេកទេសអន្តរជាតិ ដែលជួយសាកលវិទ្យាល័យវិទ្យាសាស្ត្រសុខាភិបាល ទទួលបានលទ្ធផលដ៏ល្អ

(ភ្នំពេញ)៖ លោកសាស្ដ្រាចារ្យ ម៉ម ប៊ុនហេង រដ្ឋមន្ដ្រីក្រសួងសុខាភិបាល បានបំពាក់គ្រឿងឥស្សរិយយស មេដាយសហមេត្រី ថ្នាក់ធិបឌិន្ទ ជូនលោកបណ្ឌិត Olivier Segeral អតីតអ្នកជំនាញការបច្ចេកទេសអន្តរជាតិ សម្រាប់សាកលវិទ្យាល័យវិទ្យាសាស្ដ្រាសុខាភិបាល បន្ទាប់ពីលោកបណ្ឌិតបានកសាងនូវស្នាដៃជាច្រើនជូនសាកលវិទ្យាល័យកន្លងមកនេះ។

ពិធីបំពាក់គ្រឿងឥស្សរិយយសនេះ បានធ្វើឡើងនៅរសៀលថ្ងៃទី២៩ ខែឧសភា ឆ្នាំ២០២៣ ក្រោមអធិបតីភាពលោកសាស្ត្រាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល និងជាប្រធានក្រុមប្រឹក្សាភិបាល នៃសាកលវិទ្យាល័យវិទ្យាសាស្ត្រសុខាភិបាល ។

លោករដ្ឋមន្ត្រីក្រសួងសុខាភិបាល បានសម្តែងនូវការកោតសរសើរដោយស្មោះ ដល់លោកបណ្ឌិត Olivier Segeral ដែលបានខិតខំលើកស្ទួយកិច្ចការស្រាវជ្រាវនៅសាកលវិទ្យាល័យវិទ្យាសាស្ត្រសុខាភិបាល ព្រមទាំងបានចូលរួមបណ្តុះបណ្តាល ដឹកនាំនិក្ខេបបទ អំពីវិធីសាស្ត្រនៃការស្រាវជ្រាវ និងរបៀបសរសេរគម្រោងស្រាវជ្រាវដល់និស្សិត និងបុគ្គលិកសាកលវិទ្យាល័យវិទ្យាសាស្ត្រសុខាភិបាល ក្នុងរយៈពេលកន្លងមក។

ជាមួយគ្នានេះ លោករដ្ឋមន្ត្រីបានថ្លែងអំណរគុណដល់ស្ថានទូតបារាំងប្រចាំកម្ពុជា ដែលបានជួយសម្របសម្រួលផ្តល់នូវអ្នកជំនាញការបច្ចេកទេសអន្តរជាតិ ជូនសាកលវិទ្យាល័យវិទ្យាសាស្ត្រសុខាភិបាល ដើម្បីគាំទ្រ អនុវត្តការងារស្រាវជ្រាវ និងជួយបណ្តុះបណ្តាលមន្ត្រី បុគ្គលិក និស្សិតរបស់សាកលវិទ្យាល័យវិទ្យាសាស្ត្រសុខាភិបាល។ លោករដ្ឋមន្ដ្រីក៏បានថ្លែងអំណរគុណដល់ អង្គការ ANRS ដែលបានជួយឧបត្ថម្ភ គាំទ្រគម្រោងសិក្សាស្រាវជ្រាវនានា នៅសាកលវិទ្យាល័យវិទ្យាសាស្ត្រសុខាភិបាល។

លោករដ្ឋមន្ត្រីបានថ្លែងបន្ដថា «ខ្ញុំសូមវាយតម្លៃខ្ពស់ចំពោះ កិច្ចសហប្រតិបត្តិការប្រកបដោយផ្លែផ្កាទាំងនេះ និងជាពិសេសចំពោះកិច្ចខិតខំប្រឹងប្រែងរបស់ លោកបណ្ឌិត Olivier Segeral នាពេលកន្លងមក។ ខ្ញុំសង្ឃឹមថា លោកបណ្ឌិតនឹងបន្តជួយសាកលវិទ្យាល័យវិទ្យាសាស្ត្រសុខាភិបាលបន្តទៀត ទោះលោកបណ្ឌិតបានបញ្ចប់អាណត្តិការងាររបស់ខ្លួននៅសាកលវិទ្យាល័យវិទ្យាសាស្ត្រសុខាភិបាល រួចហើយក្ដី»។

លោករដ្ឋមន្ត្រីបានបន្តទៀតថា «ដើម្បីជាសក្ខីភាពនៃការដឹងគុណ ចំពោះការខិតខំប្រឹងប្រែងរបស់លោកបណ្ឌិត រាជរដ្ឋាភិបាលកម្ពុជា បានសម្រេចផ្តល់ជូននូវគ្រឿងឥស្សវ័យយស មេដោយសហមេត្រី ថ្នាក់ធិបឌិន្ទ។

ដើម្បីបង្កើនគុណភាព នៃការផ្តល់សេវាពិនិត្យ និងព្យាបាលជំងឺជូនប្រជាពលរដ្ឋប្រកបដោយប្រសិទ្ធភាព រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតរបស់ សម្តេចតេជោ ហ៊ុន សែន នាយករដ្ឋមន្ត្រីកម្ពុជា គាំទ្រយ៉ាងពេញទំហឹង ដោយផ្តល់អាទិភាពខ្ពស់ដល់វិស័យសុខាភិបាល ជាពិសេសការបណ្តុះបណ្តាលធនធានមនុស្ស ប្រកបដោយសមត្ថភាព ដែលនេះនឹងនាំមកនូវភាពរឹងមាំ នៃការអភិវឌ្ឍសេដ្ឋកិច្ចជាតិ។

លោករដ្ឋមន្ត្រីបានគូសបញ្ជាក់ថា លើមូលដ្ឋាននេះ ក្រសួងសុខាភិបាលលើកទឹកចិត្តឱ្យសាស្ត្រាចារ្យ និស្សិតសាកលវិទ្យាល័យ វិទ្យាសាស្ត្រសុខាភិបាល ខិតខំធ្វើការសិក្សាស្រាវជ្រាវជាប្រចាំ ដើម្បីសម្រួចទាំងចំណេះដឹង ទ្រឹស្ដី និងការអនុវត្តជាក់ស្ដែង ឱ្យកាន់តែប្រសើរឡើង សំដៅបង្កើនប្រសិទ្ធភាពក្នុងការផ្តល់សេវាសុខាភិបាល ជូនប្រជាពលរដ្ឋ។

ជាងនេះទៅទៀត ក្រសួងសុខាភិបាល នៅតែបន្ដជំរុញកិច្ចសហប្រតិបត្តិការ និងលើកកម្ពស់ភាពជាដៃគូ រវាងរាជរដ្ឋាភិបាលកម្ពុជា និងដៃគូអភិវឌ្ឍទាំងអស់ ដើម្បីពង្រឹងការងារបណ្តុះបណ្តាល និងការងារ ស្រាវជ្រាវក្នុងវិស័យសុខាភិបាល។

ឆ្លៀតក្នុងឱកាសនោះដែរ លោកសាស្ត្រាចារ្យ សាផុន វឌ្ឍនៈ ទីប្រឹក្សាក្រសួងសុខាភិបាល និងជាសាកលវិទ្យាធិការសាកលវិទ្យាល័យវិទ្យាសាស្ត្រសុខាភិបាល បានគូសរម្លឹកថា លោកបណ្ឌិត Olivier Segeral បានសិក្សា និងទទួលបានសញ្ញាបត្រជាច្រើន។ ចាប់តាំងពីឆ្នាំ១៩៩៩ មក លោកបណ្ឌិត បានចាប់ផ្តើមអនុវត្តការងារស្រាវជ្រាវ ដែលការងារស្រាវជ្រាវជាចម្បងរបស់គាត់ ផ្តោតលើ ជំងឺឆ្លង រូមមាន Ebola virus, HIV, Hepatitis, HPV និងជំងឺឱកាសនិយមផ្សេងៗទៀត។

លោកសាស្ត្រាចារ្យបានបន្តថា តាមរយៈកិច្ចសហប្រតិបត្តិការ រវាងសាកលវិទ្យាល័យវិទ្យាសាស្ត្រសុខាភិបាល និង Agence Nationale de Recherche sur le sida et les hepatites virales (ANRS) នៅឆ្នាំ២០១៥ លោកបណ្ឌិត Olivier Segeral បានមកបម្រើការងារ នៅសាកលវិទ្យាល័យវិទ្យាសាស្ត្រសុខាភិបាល ក្នុងតួនាទីជាអ្នកជំនាញការបច្ចេកទេសអន្តរជាតិ។ ក្នុងតួនាទីនេះហើយ ដែលលោកបណ្ឌិត បានចូលរួមចំណែកយ៉ាងសំខាន់ ក្នុងការបណ្ដុះបណ្តាល និងស្រាវជ្រាវ នៅសាកលវិទ្យាល័យវិទ្យាសាស្ត្រសុខាភិបាល៕

(សូមអានបន្ត)

ព្រឹកថ្ងៃនេះ សម្តេចតេជោ ហ៊ុន សែន អញ្ជើញសម្ពោធអគារសិក្សាថ្មីតម្លៃជិត ២លានដុល្លារ នៅពុទ្ធិកសាកលវិទ្យាល័យ​ព្រះសីហមុនីរាជា

(ភ្នំពេញ)៖ នៅព្រឹកថ្ងៃអង្គារ ១១កើត ខែជេស្ឋ ឆ្នាំថោះ ព.ស. ២៥៦៧ ត្រូវនឹងថ្ងៃទី៣០ ខែឧសភា ឆ្នាំ២០២៣នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា អញ្ជើញ​សម្ពោធអគារសិក្សាថ្មី នៅពុទ្ធិកសាកលវិទ្យាល័យព្រះសីហមុនីរាជា ស្ថិតក្នុងបរិវេណ​វត្ត​ស្វាយពពែ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។

អគារសិក្សាថ្មីនេះ ត្រូវបានប្រសិទ្ធនាមថា «អគារសម្តេចព្រះមហាសង្ឃរាជ បួរ គ្រី» ត្រូវ​បាន​​សាងសង់ឡើង ដោយចំណាយថវិកាសរុបជិត ២លានដុល្លារសហរដ្ឋអាមេរិក (ខ្វះ ១ដុល្លារ គ្រប់ ២លានដុល្លារ)។ ថវិកា​សាងសង់អគារសិក្សាថ្មីនេះ ទទួលបានការ​ឧបត្ថម្ភ​ពី​សម្តេចតេជោ ហ៊ុន សែន និងសម្តេច​កិត្តិ​ព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាក​បាទក្រហកម្ពុជា និងក្រុមគ្រួសារ ព្រម​ទាំង​​សប្បុរសជននានា។

លោក ឈិត សុខុន រដ្ឋមន្ត្រីក្រសួងធម្មការ និងសាសនា បានឱ្យដឹងថា អគារសម្តេច​ព្រះ​មហាសង្ឃរាជ បួរ គ្រី មានបន្ទប់សិក្សា ការិយាល័យ បណ្ណាល័យតេជោ​សន្តិភាព សាល​សវការកាត់ក្តីសម្រាប់និស្សិតផ្នែកច្បាប់ និងសាលប្រជុំ។ អគារនេះ មានកម្ពស់ ៩ជាន់ ស្មើនឹង ៤៥បន្ទប់។

អគារនេះ បានបញ្ចុះបឋមសិលាសាងសង់នៅថ្ងៃទី៤ ខែកក្កដា ឆ្នាំ២០២២ ក្រោមអធិ​ប​តី​ភាពរបស់នាយឧត្តមសេនីយ៍ ហ៊ុន ម៉ាណែត អគ្គមេបញ្ជាការរង នៃកងយោធ​ពល​ខេម​រ​ភូមិន្ទ និងជាមេបញ្ជាការកងទ័ពជើងគោក ជាតំណាងដ៏ខ្ពង់ខ្ពស់របស់សម្តេចតេជោ ហ៊ុន សែន។

លោក ឈិត សុខុន បានឱ្យដឹងដែរថា អគារថ្មីនេះ បានរចនាប្លង់ស្ថាបត្យកម្ម​រចនា​ប័ទ្ម​ខ្មែរ បែបសហសម័យ នាសម័យតេជោសន្តិភាព និងអភិវឌ្ឍន៍ ដោយសំយោគ​ចូល​នូវ​រច​នាប័ទ្មស្ថាបត្យកម្មខ្មែរសំខាន់ៗ រួមមានស្ថាបត្យកម្មប្រពៃណីផ្ទះបុរាណខ្មែរ ព្រះពុទ្ធ​សាស​នា ប្រាសាទបុរាណខ្មែរ (អង្គរវត្ត បន្ទាយស្រី និងប្រាសាទបាគង) សំណង់បេតិកភណ្ឌ​អា​ណានិគម និងស្ថាបត្យកម្មទំនើបកម្ម។

អគារនេះ មានលក្ខណៈសំខាន់ៗ ដូចខាងក្រោម៖

* ជាន់ផ្ទាល់ដី៖ ជាលំហគ្មានជញ្ជាំងមានខ្យល់ឆ្លងកាត់(ដូចផ្ទះខ្មែរសាងសង់ផុតពីដី)ប្រើប្រាស់ជាកន្លែងជួបជុំសមណនិស្សិត និស្សិត កន្លែងបង្ហាញព័ត៌មានសិក្សា ចំណត​ទោ​ចក្រយានយន្ដ និងសួនច្បាររុក្ខជាតិបៃតង

* ជាន់ទី១៖ អាសនៈតម្កល់ព្រះឆាយាល័ក្ខណ៍សម្ដេចព្រះមហាសង្ឃរាជ បួរ គ្រី

- បន្ទប់ព្រះសាកលវិទ្យាធិការ

- បន្ទប់សាកលវិទ្យាធិការរង

- ការិយាល័យច្រកចេញ-ចូលតែមួយ

- ការិយាល័យរដ្ឋបាល

- ការិយាល័យគណនេយ្យ

- ការិយាល័យសិក្សា

- បន្ទប់សាស្ដ្រាចារ្យ

* ជាន់ទី២៖ បន្ទប់សិក្សាចំនួន ៥ បន្ទប់

ជាន់ទី៣៖ សាលប្រជុំធំ(៨៩៩នាក់) សាលប្រជុំតូច(១០០នាក់) បន្ទប់រង់ចាំ (គណៈ​អធិបតី) បន្ទប់រៀបចំកម្មវិធី បន្ទប់សម្លៀកបំពាក់ និងតុបតែង​បន្ទប់​រៀបចំអាហារសម្រន់ បន្ទប់សង្គ្រោះបឋម និងបន្ទប់ដាក់សម្ភារៈ

* ជាន់ទី៤៖ បណ្ណាល័យតេជោសន្តិភាព

* ជាន់ទី៥ ដល់ទី៨៖ បន្ទប់សិក្សាសរុប ២០បន្ទប់

* ជាន់ទី៩៖ សាលសវនាការនិម្មិត និងសាលប្រជុំខ្នាតតូច ក្រឡាផ្ទៃសំណង់ អគារ​សរុប ៣,៧៩៥ ម៉ែត្រការ៉េ និងតភ្ជាប់ជាមួយអគារសម្តេចតេជោ ហ៊ុន សែន ទំហំ ១,៩២០ម៉ែត្រការ៉េ។ សរុបក្រឡាផ្ទៃអគារទាំងពីរទំហំ ៥៧១៥ ម៉ែត្រការ៉េ។

សំណង់ស្ថាបត្យកម្មអគារសម្តេចព្រះមហាសង្ឃរាជ បួរ គ្រី ជាប្រភេទសំណង់​បេតុង​អាម៉េ គោរពតាមបទដ្ឋានស្តង់ដារបច្ចេកទេស ក្បូរក្បាច់ពិពិធវិចិត្ររចនា និងសោភ័ណ​ភាព​ល្អប្រណិត។ អគារនេះ ប្រើប្រាស់រយៈពេលជាង ១០ខែ គិតចាប់ពីថ្ងៃបើកកា​រដ្ឋាន​សាងសង់មក។

ក្រៅពីនេះ អគារ កំពុងបំពាក់សម្ភារៈបរិក្ខារទំនើបៗ និង តភ្ជាប់បណ្តាញអ៉ីន​ធើណេត​ដែល​មានល្បឿនលឿន ចំណាយថវិកាអស់ប្រមាណ ៥៧ម៉ឺនដុល្លារសហរដ្ឋអាមេរិក។ ក្នុងនោះ ថវិការបស់សម្តេចតេជោនាយករដ្ឋមន្ត្រី ក្រោយពីការសាងសង់រួចចំនួន ៣៥ ម៉ឺនដុល្លារសហរដ្ឋអាមេរិក និងនៅខ្វះថវិកាចំនួន ២២ម៉ឺនដុល្លារបន្ថែមទៀត។ ការបំពាក់​សម្ភារៈបរិក្ខារនេះ នឹងផ្តល់លទ្ធភាពដល់សមណនិស្សិត និស្សិត ក្នុងការប្រើប្រាស់ និង​សិក្សាស្រាវជ្រាវ។ ទាំងទំហំ កម្ពស់ រចនាប័ទ្ម សំណង់ស្ថាបត្យកម្ម និងការបំពាក់សម្ភារៈ​បរិក្ខារ បានធ្វើឱ្យអគារសិក្សាថ្មីនេះ ក្លាយជាសមិទ្ធផលប្រវត្តិសាស្ត្រពុំធ្លាប់មានសម្រាប់ ពុទ្ធិកសិក្សានៅកម្ពុជា ដើម្បីផ្តល់ឱកាសដល់សមណនិស្សិត និស្សិត ក៏ដូចជាកូនខ្មែរ​អាច​បន្តការសិក្សា នឹងក្លាយជាសសរទ្រូងរបស់ប្រទេសជាតិនាថ្ងៃអនាគត។

អគារនេះ ជាផ្នែកមួយដ៏សំខាន់ក្នុងការបង្ហាញនូវអត្តសញ្ញាណជាតិ ដែលរួមបញ្ចូលគ្នា​នូវ​រចនាប័ទ្មស្ថាបត្យកម្មខ្មែរជាច្រើន រំលេចចេញជាស្ថាបត្យកម្មខ្មែរបែបសហសម័យ ក្នុង​សម័យ​តេជោសន្តិភាព និងអភិវឌ្ឍន៍ សម្រាប់ជាមរតករបស់រដ្ឋតរៀងទៅ។

សូមបញ្ជាក់ថា ពុទ្ធិកសាកលវិទ្យាល័យព្រះសីហមុនីរាជា គឺជាគ្រឹះស្ថានឧត្តមសិក្សា​សា​ធារ​ណៈរបស់រដ្ឋ ស្ថិតក្រោមក្រសួងធម្មការ និងសាសនា ផ្ដួចផ្ដើមបង្កើតឡើង​ដោយព្រះ​រាជ​តម្រិះដ៏ខ្ពង់ខ្ពស់របស់សម្តេចព្រះអភិសិរីសុគន្ធាមហាសង្ឃរាជាធិបតី កិត្តិ​ឧទេស​បណ្ឌិត បួរ គ្រី សម្តេចព្រះមហាសង្ឃរាជ នៃគណៈធម្មយុត្តិកនិកាយ នៃព្រះរាជា​ណា​ចក្រ​កម្ពុជា និងជាព្រះសាកលវិទ្យាធិការ នៃពុទ្ធិកសាកលវិទ្យាល័យព្រះសីហមុនីរាជា និង​បានការប្រោ​សព្រះរាជ​ទាន​នាមពីព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះ​រា​ជាណាចក្រកម្ពុជា នៅថ្ងៃទី០៤ ខែធ្នូ ឆ្នាំ២០០៤ មាននាមថា «ពុទ្ធិកមហាវិទ្យាល័យព្រះសីហមុនីរាជា»។

ក្រោយមកពុទ្ធិកមហាវិទ្យាល័យព្រះសីហមុនីរាជា បានក្លាយជាពុទ្ធិកសាកល​វិទ្យាល័យ​ព្រះ​សីហមុនីរាជា តាមអនុក្រឹតលេខ៨៣ អនក្រ.ប.កចុះថ្ងៃទី២៤ ខែកក្កដា ឆ្នាំ២០០៧ របស់រាជរដ្ឋាភិបាលកម្ពុជា ដើម្បីបណ្ដុះបណ្ដាលធនធានមនុស្ស ទាំងបព្វជិត និងគ្រហស្ថ ស្របតាមគោលការណ៍មនុស្សធម៌ និងតម្លៃស្នូលគឺ «មេត្តា សតិ បញ្ញា» ដោយមិនប្រកាន់​និន្នាការនយោបាយ ពណ៌សម្បុរ ជំនឿសាសនា និងការរើសអើងណាមួយឡើយ។

ពុទ្ធិកសាកលវិទ្យាល័យព្រះសីហមុនីរាជា មាន៤ ពុទ្ធិកមហាវិទ្យាល័យរួមមាន៖ ១. ពុទ្ធិក​មហាវិទ្យាល័យទស្សនវិជ្ជាសាសនា និងនីតិសាស្ត្រ, ២. ពុទ្ធិកមហាវិទ្យាល័យបាលី​-សំ​ស្រ្កឹត និងភាសាបរទេស, ៣. ពុទ្ធិកមហាវិទ្យាល័យ វិទ្យាសាស្ត្រអប់រំ និងអក្សរសាស្ត្រ និង​៤. ពុទ្ធិកមហាវិទ្យាល័យព័ត៌មានវិទ្យា ដោយបណ្តុះបណ្តាលលើ ៧ឯកទេសរួមមាន៖ ១. អក្សរសាស្ត្រខ្មែរ, ២. ទស្សនវិជ្ជាព្រះពុទ្ធសាសនា, ៣. វិទ្យាសាស្ត្រអប់រំ, ៤. នីតិសាស្ត្រ, ៥. គ្រប់គ្រងទូទៅ, ៦. អក្សរសាស្ត្រអង់គ្លេស និង៧. វិទ្យាសាស្ត្រកុំព្យូទ័រ។

ជាងនេះទៅទៀត ពុទ្ធិកសាកលវិទ្យាល័យកំពុងបណ្តុះបណ្តាលថ្នាក់បរិញ្ញាបត្រជាន់​ខ្ពស់​លើ​ឯកទេសចំនួន៧ ដូចជា៖ ១. អក្សរសាស្ត្រខ្មែរ, ២. គ្រប់គ្រងទូទៅ, ៣. បង្រៀន​ភា​សា​​អង់គ្លេស, ៤. វិទ្យាសាស្ត្រអប់រំ, ៥. រដ្ឋបាលសាធារណៈ, ៦. នីតិឯកជន និង៧. ទស្សន​វិជ្ជាព្រះពុទ្ធសាសនា។

ក្រោយពេលបញ្ចប់ការសិក្សា សមណនិស្សិត និស្សិតទាំងថ្នាក់បរិញ្ញាបត្រ និងបរិញ្ញា​បត្រ​ជាន់​ខ្ពស់គ្រប់ជំនាន់ទទួលបានការប្រោសព្រះរាជទានសញ្ញាបត្រពី ព្រះករុណាព្រះបាទ សម្តេច​ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា។

នៅថ្ងៃទី១៧ ខែតុលា ឆ្នាំ២០២២ ពុទ្ធិកសាកលវិទ្យាល័យព្រះសីហមុនីរាជា បានក្លាយ​ជា​សមាជិក សមាគមសាកលវិទ្យាល័យអន្តរជាតិ នៃអង្គការ UNESCO ហៅកាត់ថា IAU ដែលមានសាកលវិទ្យាល័យជាង៦០០ ជាសមាជិក មកពី ១៣០ប្រទេសទូទាំងពិភព​លោក​។ ការណ៍នេះ បានក្លាយជាប្រវត្តិសាស្ត្រថ្មី ដែលពុំធ្លាប់មានក្នុងប្រវត្តិពុទ្ធិកសិក្សា​នៅ​កម្ពុជា ក្នុងការលើកកម្ពស់ឧត្តមភាពពុទ្ធិកសិក្សាលើឆាកអន្តរជាតិ។

ក្រៅតែពីអគារដែលសម្ពោធដាក់ឱ្យប្រើប្រាស់ខាងលើនេះ ពុទ្ធិកសាកលវិទ្យាល័យព្រះ​សីហមុនី​រាជាមានអគារសិក្សាចំនួន៣ផ្សេងទៀត រួមមាន៖ ទី១. អគារព្រះករុណា ព្រះ​មហាក្សត្រ សីហមុនី មាន ៩បន្ទប់, ទី២. អគាររដ្ឋបាល មានចំនួន ៩បន្ទប់, ទី៣. អគារ​សម្តេចអគ្គមហាសេនាបតីតេជោ ហ៊ុន សែន មានចំនួន ២៤បន្ទប់៕

(សូមអានបន្ត)

សមាជិកមូលនិធិស៊ីក្លូនៅភ្នំពេញជិត៣០០នាក់ទទួលបានអាវភ្លៀង មី និងថវិការបស់សម្តេចតេជោ ហ៊ុន សែន

ភ្នំពេញ៖ ដើម្បីជួយសម្រួលការលំបាក ខណៈរដូវវស្សាបានឈានមកដល់ សមាជិកមូលនិធិស៊ីក្លូក្នុងរាជធានីភ្នំពេញចំនួន២៩៩នាក់ ទទួលបានអាវភ្លៀង មី និងថវិការបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងជាប្រធានកិត្តិយសមូលនិធិត្រីចក្រយានកម្ពុជា(ស៊ីក្លូ) ។

ថវិកា និងសម្ភារៈទាំងនេះត្រូវបានលោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ និងជាប្រធានលេខាធិការដ្ឋានមូលនិធិត្រីចក្រយានកម្ពុជា តំណាងឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ និងជាប្រធានក្រុមប្រឹក្សាភិបាលមូលនិធិត្រីចក្រយានកម្ពុជាប្រគល់ជូនសមាជិកមូលនិធិ នារសៀលថ្ងៃអាទិត្យទី២៨ ខែឧសភា ឆ្នាំ២០២៣ នៅសាលារាជធានីភ្នំពេញ ។

លោក ម៉េត មាសភក្តី បានមានប្រសាសន៍ឲ្យដឹងថា សម្តេចអគ្គមហាសេនាបតីតេជោ ហ៊ុន សែន តែងក្រើនរំលឹកឲ្យឯកឧត្ដម ឃួង ស្រេង យកចិត្តទុកដាក់និងមើលថែពីសុខទុក្ខសមាជិកអ្នកធាក់ស៊ីក្លូក្នុងរាជធានីភ្នំពេញ ជាក់ស្តែងនៅពេលនេះ សមាជិកទាំង២៩៩នាក់បានទទួល អាវភ្លៀង មី និងថវិការបស់សម្តេចតេជោ ហ៊ុន សែន  បន្ថែមពីលើការឧបត្ថម្ភប្រចាំខែបន្ថែម ។ 

លោក ម៉េត មាសភក្ដី បន្ថែមថា សម្តេចតេជោ ហ៊ុន សែន បានយកចិត្តទុកដាក់ខ្លាំងណាស់ចំពោះបងប្អូនជាសមាជិកមូលនិធិស៊ីក្លូ ពោលគឺឲ្យតែមានពិធីបុណ្យជាតិធំៗម្តងៗ សម្តេចតែងបានផ្តល់អំណោយជូនជានិច្ច។ ក្រៅពីនេះ អ្នកធាក់ស៊ីក្លូទាំង២៩៩នាក់ក៏ទទួលបានប្រាក់ខែជារៀងរាល់ខែចំនួន២១ម៉ឺនរៀលផងដែរ ដោយក្នុង១ខែអាចបើកបាន៣ដងក្នុង១ដង៧ម៉ឺនរៀល ជាមួយនឹងការផ្តល់ជូនបណ្ណ ប. ស. ស ដើម្បីឲ្យសមាជិកអាចទៅព្យាបាលជំងឺដោយមិនអស់ប្រាក់នៅតាមមន្ទីរពេទ្យរដ្ឋនានា ។ បន្ថែមពីនេះទៀត ក្នុងអំឡុងពេលដែលប្រទេសកម្ពុជា ក៏ដូចជារាជធានីភ្នំពេញ កំពុងប្រឈមមុខនឹងការរាតត្បាតជម្ងឺកូវីដ-១៩ សម្តេចមិនត្រឹមតែផ្តល់វ៉ាក់សាំងជូនសមាជិកអ្នកធាក់ស៊ីក្លូទេ បានផ្តល់អំណោយជាគ្រឿងឧបភោគ បរិភោគ ម៉ាស អាកុល ជែល ជូនថែមទៀត។ 

  គួរបញ្ជាក់ផងដែរថា មូលនិធិនេះត្រូវបានបង្កើតឡើងតាំងពីថ្ងៃទី១៨ ខែមករា ឆ្នាំ២០១៨ ក្រោមការផ្តួចផ្តើមដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន សំដៅអភិរក្សស៊ីក្លូ ដែលមានដើមកំណើតតាំងពីសម័យអនានិគមនិយមបារាំងមកម្ល៉េះ៕



(សូមអានបន្ត)

លោកបណ្ឌិត ហ៊ុន ម៉ាណែត ជួបពិភាក្សាការងារជាមួយសមាជិកបម្រុង នៃគណៈកម្មាធិការមជ្ឈិមបក្សកុម្មុយនីស្តហូជីមិញ

(ភ្នំពេញ)៖ នៅទីស្នាក់ការកណ្តាលគណបក្សប្រជាជនកម្ពុជា (វិមាន ៧មករា) នាល្ងាចថ្ងៃទី២៥ ខែឧសភា ឆ្នាំ២០២៣ លោកបណ្ឌិត ហ៊ុន ម៉ាណែត សមាជិកគណៈអចិន្រ្តៃយ៍ នៃគណៈកម្មាធិការកណ្តាល គណបក្សប្រជាជនកម្ពុជា និងជាប្រធានយុវជនគណបក្សប្រជាជនកម្ពុជាថ្នាក់កណ្តាល បានទទួលជួបពិភាក្សាការងារជាមួយ លោក ប៊ុយ ក្វាងហ៊ុយ (Bui Quang Huy) សមាជិកបម្រុង នៃគណៈកម្មាធិការមជ្ឈិមបក្សកុម្មុយនីស្តហូជីមិញ អាណត្តិទី១៣ និងជាលេខាធិការទី១ នៃគណៈកម្មាធិការមជ្ឈិមសម្ព័ន្ធយុវជនកុម្មុយនីស្តហូជីមិញ ក្នុងឱកាសបំពេញទស្សនកិច្ចនៅកម្ពុជា ពីថ្ងៃទី២៣ ដល់២៦ ខែឧសភា ឆ្នាំ២០២៣។បន្ទាប់ពីជំនួបពិភាក្សា ភាគីទាំងពីរបានចុះហត្ថលេខាលើកិច្ចព្រមព្រៀងសហប្រតិបត្តិការរវាង យុវជនគណបក្សប្រជាជនកម្ពុជាថ្នាក់កណ្តាល និងមជ្ឈិមសម្ព័ន្ធយុវជនកុម្មុយនីស្តហូជីមិញ សម្រាប់ឆ្នាំ ២០២៣-២០២៨។

ក្នុងឱកាសជំនួបនោះ លោក ប៊ុយ ក្វាងហ៊ុយ (Bui Quang Huy) បានថ្លែងនូវការអបអរសាទរចំពោះសមិទ្ធផលនានាដែលកម្ពុជាសម្រេចបានជាទីគាប់ចិត្ត នាពេលកន្លងមក រួមមាន ការគ្រប់គ្រងស្ថានភាពការរីករាលដាលនៃជំងឺកូវីដ-១៩ បានយ៉ាងល្អ ការបើកដំណើរការសេដ្ឋកិច្ច សង្គមកម្ពុជាឡើងវិញ ការធ្វើជាម្ចាស់ផ្ទះរៀបចំ កិច្ចប្រជុំកំពូលអាស៊ាន លើកទី៤០ និងទី៤១ និងកិច្ចប្រជុំកំពូលពាក់ព័ន្ធ កិច្ចប្រជុំអន្តរសភាអាយប៉ា លើកទី៣២ ការរៀបចំការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ឆ្នាំ២០២២ បានល្អការរៀបចំព្រឹត្តិការណ៍កីឡាអាស៊ីអាគ្នេយ៍លើកទី៣២ ប្រកបដោយភាពជោគជ័យយ៉ាងត្រចះត្រចង់ និងឆ្ពោះទៅរៀបចំការប្រកួតកីឡាអាស៊ានប៉ារ៉ាហ្គេម លើកទី១២ នាពេលឆាប់ៗនេះ។

លោកបន្ដថា ភាពជោគជ័យទាំងនេះ បានលើកកម្ពស់តួនាទី និងកិត្យានុភាពរបស់កម្ពុជាទាំងក្នុងក្របខ័ណ្ឌតំបន់ និងលើឆាកអន្តរជាតិ ក្រោមការដឹកនាំរបស់ថ្នាក់ដឹកនាំគណបក្សប្រជាជនកម្ពុជា និងសម្តេចតេជោប្រធានគណបក្ស។ ទន្ទឹមនឹងនេះ លោកក៏បានបង្ហាញនូវជំនឿជាក់ថា កម្ពុជានឹងរៀបចំការបោះឆ្នោតជ្រើសតាំងតំណាងរាស្រ្ត នីតិកាលទី៧ នៅខែកក្កដា ឆ្នាំ២០២៣ ប្រកបដោយភាពជោគជ័យ។

ជាមួយគ្នានេះ លោកបណ្ឌិត ហ៊ុន ម៉ាណែត បានថ្លែងនូវការអបអរសាទរចំពោះការរៀបចំមហាសន្និបាតមជ្ឈិមសម្ព័ន្ធយុវជនកុម្មុយនីស្តហូជីមិញ ប្រកបដោយភាពជោគជ័យ និងផ្លែផ្កា ព្រមទាំងអបអរសាទរដល់ លោក ប៊ុយ ក្វាងហ៊ុយ (Bui Quang Huy) ដែលទទួលបានការតែងតាំងជាផ្លូវការជាលេខាធិការទី១ នៃគណៈកម្មាធិការមជ្ឈិមសម្ព័ន្ធយុវជនកុម្មុយនីស្តហូជីមិញ។

ភាគីទាំងពីរបានបង្ហាញនូវសុទិដ្ឋិនិយមក្នុងការពង្រឹង និងពង្រីកនូវចំណងមិត្តភាព សាមគ្គីភាព និងកិច្ចសហប្រតិបត្តិការរវាងយុវជនគណបក្សប្រជាជនកម្ពុជា និងមជ្ឈិមសម្ព័ន្ធយុវជនកុម្មុយនីស្តហូជីមិញ ស្របតាមស្មារតីភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ រឹងមាំយូរអង្វែង ឲ្យកាន់តែល្អប្រសើរ និងឈានឆ្ពោះឡើងកម្រិតថ្មីមួយទៀត។

បន្ទាប់ពីជំនួបពិភាក្សា ភាគីទាំងពីរ បានចុះហត្ថលេខាលើកិច្ចព្រមព្រៀងសហប្រតិបត្តិការរវាងយុវជនគណបក្សប្រជាជនកម្ពុជា និងមជ្ឈិមសម្ព័ន្ធកុម្មុយនីស្តហូជីមិញ សម្រាប់ឆ្នាំ២០២៣-២០២៨៕

(សូមអានបន្ត)