អភិបាលរាជធានីភ្នំពេញ ទទួល និងប្រគល់ព្រះអគ្គិជ័យកីឡា ដើម្បីបន្តដង្ហែឆ្ពោះទៅកាន់ខេត្តជុំវិញបឹងទន្លេសាប នាព្រឹកថ្ងៃទី២៩ ខែមេសានេះ

 

 ភ្នំពេញ ៖ថ្ងៃទី២៩ ខែមេសា ឆ្នាំ២០២៣​​ ឯកឧត្ដម ឃួង ស្រេង អភិបាលរាជធានីភ្នំពេញបានទទួល និងប្រគល់ ព្រះអគ្គិជ័យកីឡា ដង្ហែចេញពីវត្តលង្កាព្រះកុសុមារាម ដើម្បីបន្តឆ្ពោះទៅកាន់ខេត្តជុំវិញបឹងទន្លេសាប នាព្រឹកថ្ងៃទី២៩ ខែមេសា ឆ្នាំ២០២៣។

ព្រះអគ្គិជ័យកីឡាត្រូវដង្ហែពីវត្តលង្កាព្រះកុសុមារាម ឆ្ពោះមកវិមានឯករាជ្យ ដឹកនាំដោយតំណាង CAMSOC និង ប្រតិភូ ក្រុមការងារ កីឡាករ កីឡាការិនី មួយចំនួន និងមានក្រុមឆៃយ៉ាំនាំមុខ។ តំណាង CAMSOC បានប្រគល់ព្រះអគ្គិជ័យកីឡាជូនឯកឧត្ដមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ដោយដង្ហែពីវិមានឯករាជ្យ ឆ្ពោះទៅមុខវិទ្យាល័យស៊ីសុវត្ថិ ទើបឯកឧត្ដមកបណ្ឌិតសភាចារ្យ ហង់ ជួនណារ៉ុន ប្រគល់ជូន ឯកឧត្ដម ឃួង ស្រេង អភិបាលនៃគណៈអភិបាលរាជធានីភ្នំពេញ ដើម្បីដង្ហែបន្តមកកាន់ផ្លូវភ្លោះព្រះអង្គឌួង រួចឡើងមកមហាវិថីសហព័ន្ធរុស្ស៊ី ដល់ខាងមុខក្រសួងការពារជាតិ ត្រឡប់ក្រោយមកស្តុបបេកាសេ ឡើងមកមហាវិថីព្រះមុនីវង្ស ឆ្ពោះមករង្វង់មូលគួចកាណុង បន្តមកផ្លូវជាតិលេខ៥ រួចប្រគល់ជូនកីឡាករ កីឡាការិនីឆ្នើម ដង្ហែឆ្ពោះទៅកាន់ខេត្តកំពង់ឆ្នាំងតែម្តង។

សូមជម្រាបជូនថា ការប្រកួតបាល់ទាត់របស់ក្រុមជម្រើសជាតិកម្ពុជាក្នុងព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ ចាប់ពីថ្ងៃទី២៩ ខែមេសា ដល់ថ្ងៃទី១៦ ខែឧសភា ឆ្នាំ ២០២៣ រដ្ឋបាលរាជធានីភ្នំពេញ នឹងរៀបចំផ្សាយបន្តផ្ទាល់នៅតាមទីតាំងចំនួន៧ ដើម្បីឱ្យប្រជាពលរដ្ឋបានទស្សនា ក្នុងនោះរួមមាន៖ ១-សួនច្បារមុខវត្តបទុមវតី ស្ថិតនៅក្នុងសង្កាត់ចតុមុខ ខណ្ឌដូនពេញ ។ ២-សួនច្បារមាត់ទន្លេ ទល់មុខភោជនីយដ្ឋានមេត្រូ ស្ថិតនៅក្នុងសង្កាត់ផ្សារកណ្តាលទី១ ខណ្ឌដូនពេញ។ ៣-ក្នុងបុរីប៉េងហួតបឹងស្ងោរ ស្ថិតនៅក្នុងសង្កាត់និរោធ ខណ្ឌច្បារអំពៅ។ ៤-សួនច្បារមិត្តភាពក្បែរក្រសួងការពារជាតិ ស្ថិតនៅក្នុងសង្កាត់មិត្តភាព ខណ្ឌ៧ មករា ។ ៥-សូនច្បារទល់មុខវិទ្យាស្ថានស្រាវជ្រាវ និងអភិវឌ្ឍន៍ព្រៃឈើ-សត្វព្រៃ ស្ថិតនៅក្នុងសង្កាត់ គោកឃ្លាង ខណ្ឌសែនសុខ ។ ៦-សួន ច្បារព្រះនាងប្រាជ្ញាបារមី ស្ថិតនៅក្នុងសង្កាត់ជ្រោយចង្វារ ខណ្ឌជ្រោយចង្វារ និងទី៧-ទីលានប្រជាធិបតេយ្យ ក្បែរស្ពានអាកាសឫស្សីកែវ ស្ថិតនៅក្នុងសង្កាត់ឫស្សីកែវ ខណ្ឌឫស្សីកែវ ៕ដោយ៖ សួស សំរិត សម្រួលផ្សាយដោយ៖ដារ៉ា

(សូមអានបន្ត)

ឯកឧត្តមបណ្ឌិត ហ៊ុន ម៉ាណែត៖ “រីករាយពេញចិត្ត និងអបអរចំពោះសមិទ្ធផលដែលកើតមានបច្ចុប្បន្ន និងបន្តបោះជំហានរួមគ្នាទៅមុខ សំដៅចាប់យកអនាគតដ៏រុងរឿងមួយ ក្នុងរយៈកាលប្រមាណ ៣០ ឆ្នាំខាងមុខ”

រាជធានីភ្នំពេញ ថ្ងៃទី២៩ ខែមេសា ឆ្នាំ២០២៣នាល្ងាចថ្ងៃទី២៨ ខែមេសា ឆ្នាំ២០២៣ ឯកឧត្តម បណ្ឌិត ហ៊ុន ម៉ាណែត បានអញ្ជើញចូលរួមក្នុងពិធីរាត្រីសមោសរអបអរសាទរខួបលើកទី៣០ របស់សភាពាណិជ្ជកម្មអន្តរជាតិនៃកម្ពុជា « International Business Chamber (IBC) » នៅសណ្ឋាគារសូហ្វីតែល រាជធានីភ្នំពេញ។ថ្លែងក្នុងឱកាសប្រកបដោយភាពអធិកអធម និងរីករាយនោះ ឯកឧត្តម បណ្ឌិត បានសម្តែងនូវការអបអរសាទរ និងការកោតសសើរចំពោះដំណើរបោះជំហានរីកចម្រើនទៅមុខគួរជាទីមោទនៈក្នុងរយៈកាល ៣០ ឆ្នាំ កន្លងមកនេះ របស់សភាពាណិជ្ជកម្មអន្តរជាតិនៃកម្ពុជា ដែលបានដើរតួរនាទីយ៉ាងសំខាន់ក្នុងសហគមន៍ធុរកិច្ចនៅកម្ពុជា ជាពិសេសការជំរុញឱ្យមានកិច្ចពិភាក្សារវាងវិស័យឯកជន និងរាជរដ្ឋាភិបាល ក៏ដូចជាការចូលរួមសហការជិតស្និទ្ធជាមួយនឹងសភាពាណិជ្ជកម្មកម្ពុជា។ ទន្ទឹមនេះ សភាពាណិជ្ជកម្មអន្តរជាតិនៃកម្ពុជា ក៏ជាវេទិកាសម្រាប់ឱកាសនៃការភ្ជាប់ទំនាកទំនងរវាងបណ្តាញរវាងធុរកិច្ច រួមជាមួយនឹងការផ្តល់ជំនួយប្រឹក្សាយោបល់ដល់និយោគិនបរទេសដែលមកបណ្តាក់ទុននៅកម្ពុជាផងដែរ។ 

ឯកឧត្តម បណ្ឌិត ក៏បានជំរុញទឹកចិត្តបន្ថែមថា៖ “យើងបានកំណត់ចក្ខុវិស័យក្នុងការប្រែក្លាយប្រទេសកម្ពុជា ជាប្រទេសមានចំណូលមធ្យមកម្រិតខ្ពស់ក្នុងឆ្នាំ២០៣០ និងជាប្រទេសមានចំណូលខ្ពស់ក្នុងឆ្នាំ២០៥០ ដែលការណ៍នេះ គឺពិតជាទាមទារចាំបាច់នូវការរួបរួមគ្នាប្រកបដោយការបេ្តជ្ញាចិត្តខ្ពស់ ក្នុងការពុះពារជម្នះនូវរាល់ឧបសគ្គ ដើម្បីបង្កើតឱកាសសម្រាប់ប្រទេសកម្ពុជាដ៏រុងរឿងមួយ។ ដូច្នេះ សូមចូលរួមទាំងអស់គ្នាឈានទៅសម្រេចចក្ខុវិស័យនេះ ដោយចាប់ផ្តើមពីការរីករាយពេញចិត្ត និងអបអរចំពោះសមិទ្ធផលដែលកើតមានបច្ចុប្បន្ន និងបន្តបោះជំហានរួមគ្នាទៅមុខ សំដៅចាប់យកអនាគតដ៏រុងរឿងមួយ ក្នុងរយៈកាលប្រមាណ ៣០ ឆ្នាំខាងមុខ”។ជាចុងក្រោយ ឯកឧត្តម បណ្ឌិត ហ៊ុន ម៉ាណែត បានបង្ហាញនូវក្តីសង្ឃឹម និងភាពជឿជាក់ថា៖ «អាស្រ័យដោយមានការបន្តចូលរួមគាំទ្រ និងសហការពីសំណាក់សហគមន៍ធុរកិច្ចទាំងក្នុង និងក្រៅប្រទេស គឺនឹងជួយឱ្យយើងអាចសម្រេចទិសដៅក្នុងការនាំភាពចម្រុងចម្រើនសម្បូរសប្បាយ ជូនជាតិ និងប្រជាជនកម្ពុជា។ ពិតណាស់ ជាមួយនឹងនវានុវត្តន៍, បច្ចេកវិទ្យា, វិទ្យាសាស្ត្រ និងទេពកោសល្យរបស់ប្រជាជនកម្ពុជា យើងប្រាកដជាអាចចូលរួមកសាងកម្ពុជាមួយ ដែលមានមូលដ្ឋានសេដ្ឋកិច្ចរឹងមាំ មានភាពធន់ ចម្រុះ និងអាចប្រកួតប្រជែងនៅលើឆាកអន្តរជាតិ ជាពិសេសស្របនឹងឱកាសប្រកបដោយសក្តានុពលនៅក្នុងសតវត្សរ៍ទី២១ នេះ។

ប្រភព÷ កងទ័ពជើងគោកនៃកងយោធពលខេមរភូមិន្ទ, សម្រួលផ្សាយដោយ÷ dara

(សូមអានបន្ត)

អ្នកសារព័ត៌មានប្រមាណ ៥០នាក់ និងអ្នកជំនាញមកពី៦ប្រទេស ចូលរួមវគ្គបណ្តុះបណ្តាលសារព័ត៌មានតំបន់ទន្លេមេគង្គលើកទី២

(ភ្នំពេញ)៖ អ្នកសារព័ត៌មានប្រមាណ៥០នាក់ មកពីប្រទេសកម្ពុជា ឡាវ មីយ៉ាន់ម៉ា ថៃ និងវៀតណាម និងអ្នកជំនាញមកពីអូស្ត្រាលី បានចូលរួមវគ្គបណ្តុះបណ្តាលសារព័ត៌មានតំបន់ទន្លេមេគង្គ លើកទី២ ក្រោមប្រធានបទ «ការចូលរួមរបស់ប្រព័ន្ធផ្សព្វផ្សាយ ដើម្បីតំបន់ទន្លេមេគង្គសន្តិភា ស្ថិរភាព និងវិបុលភាព»។

សិក្ខាសាលានេះ រៀបចំឡើងដោយវិទ្យាស្ថានទំនាក់ទំនងអន្តរជាតិនៃកម្ពុជា នៃរាជបណ្ឌិត្យសភាកម្ពុជា និងក្លឹបអ្នកកាសែតកម្ពុជា រយៈពេល៣ថ្ងៃ គឺចាប់ថ្ងៃទី២៦ ដល់ថ្ងៃទី២៨ ខែមេសា ឆ្នាំ២០២៣ នៅរាជបណ្ឌិត្យសភាកម្ពុជា។

សម្រាប់ពិធីបើកបានប្រព្រឹត្តធ្វើឡើងក្រោមអធិបតីភាព លោកបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា និងមានការអញ្ជើញចូលរួមពីសំណាក់អ្នកជំនាញជាតិ និងអន្តរជាតិមួួយចំនួនផងដែរ។

បើតាម លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃកម្ពុជា បានឱ្យដឹងថា គោលបំណងដើម្បីលើកកម្ពស់ការយល់ដឹង និងស្វែងយល់អំពីប្រព័ន្ធនយោបាយ និងប្រព័ន្ធបោះឆ្នោតដំណើរការប្រជាធិបតេយ្យ និងការរៀបចំការបោះឆ្នោតនៅប្រទេសក្នុងតំបន់មេគង្គ, ពិនិត្យមើលទិដ្ឋភាពបរិស្ថាន សេដ្ឋកិច្ចសង្គម និងការអភិវឌ្ឍនៃប្រទេសមេគង្គ, ពិនិត្យមើលក្របខណ្ឌកិច្ចសហប្រតិបត្តិការនានា នៅតំបន់មេគង្គ រួមទាំងរបៀបវារៈនយោបាយ និងប្រតិបត្តិការសំខាន់ៗ និងលើកកម្ពស់ការទំនាក់ទំនង ព្រមទាំងការអនុវត្តប្រព័ន្ធផ្សព្វផ្សាយកាន់តែប្រសើរឡើងអំពីប្រព័ន្ធនយោបាយ និងការបោះឆ្នោតនៅក្នុងតំបន់មេគង្គ។

ទន្លេមេគង្គ គឺជាទន្លេដែលវែងជាងគេនៅអាស៊ីអាគ្នេយ៍។ ទន្លេនេះមានប្រវែងប្រហែល ៤,៩០០គីឡូម៉ែត្រ ដែលហូរចេញពីប្រភពរបស់វានៅលើខ្ពង់រាបទីបេ ក្នុងប្រទេសចិន កាត់តាមប្រទេសមីយ៉ាន់ម៉ា ឡាវ ថៃ កម្ពុជា និងវៀតណាម តាមរយៈដីសណ្ដដ៏ធំចូលទៅក្នុងសមុទ។ អាងទន្លបង្ហូរលើផ្ទៃដីសរុបចំនួន ៧៩៥,០០០គីឡូម៉ែត្រការ៉េ ហើយមានការបញ្ចេញចោលប្រចាំឆ្នាំជាមធ្យម ៤៧៥គីឡូម៉ែត្រគូប ដែលជាទំហំធំបំផុតទី១០ នៅលើពិភពលោក។

តំបន់ដែលទន្លេហូរកាត់ត្រូវបានគេហៅថា មហាអនុតំបន់ទន្លេមេគង្គ (GMS) ឬជាមហាអនុតំបន់ទន្លេមេគង្គ ដែលលាតសន្ធឹងលើប្រទេសចំនួន៦ គឺប្រទេសចិន មីយ៉ាន់ម៉ា ឡាវ ថៃ កម្ពុជា និងវៀតណាម។ វាជាតំបន់អន្តរប្រទេសនៃអាងទន្លេមេគង្គដែលមានប្រជាជនជាង ៣០០លាននាក់។ មហាទន្លេមេគង្គ មានធនធានធម្មជាតិ និងវប្បធម៌ដែលមិនអាចជំនួសបាន ហើយត្រូវបានចាត់ទុកថាជាតំបន់សម្បូរជីវចម្រុះដ៏សំខាន់បំផុតមួយរបស់ពិភពលោក។ តំបន់នេះ គឺជាកន្លែងផ្គត់ផ្គង់អាហារដ៏សំខាន់ និងជាទីតាំងនៃគម្រោងសាងសង់ខ្នាតធំជាច្រើនដែលមានផលប៉ះពាល់ដល់សង្គម និងសេដ្ឋកិច្ច។

មានក្របខ័ណ្ឌកិច្ចសហប្រតិបត្តិការមេគង្គមួយចំនួនរួមមាន៖ កិច្ចសហប្រតិបត្តិការ មេគង្គ-ឡានឆាង (សាធារណៈរដ្ឋប្រជាមានិតចិន) កិច្ចសហប្រតិបត្តិការមេគង្គ-គង្គា (ឥណ្ឌា) កិច្ចសហប្រតិបត្តិការមេគង្គ-ជប៉ុន កិច្ចសហប្រតិបត្តិការមេគង្គ-សាធារណរដ្ឋកូរ៉េ កិច្ចសហប្រតិ- បត្តិការមេគង្គក្រោម ដែលបច្ចុប្បន្នជាភាពជាដៃគូមេគង្គ-សហរដ្ឋអាមេរិក (សហរដ្ឋអាមេរិក) និងមិត្តនៃទន្លេមេគង្គក្រោម មហាអនុតំបន់មេគង្គ និងគណៈកម្មការទន្លេមេគង្គ។

ក្របខ័ណ្ឌកិច្ចសហប្រតិបត្តិការមេគង្គទាំងអស់ មានវិស័យនៃកិច្ចសហប្រតិបត្តិការខ្លះផ្សេងគ្នា និងវិស័យខ្លះទៀតស្រដៀងគ្នា ឧទាហរណ៍ កិច្ចសហប្រតិបត្តិការមេគង្គ-ឡានឆាង ផ្តោតលើសសរស្តម្ភសំខាន់ៗចំនួនបី គឺកិច្ចសហប្រតិបត្តិការនយោបាយនិងសន្តិសុខ សេដ្ឋកិច្ច និងការអភិវឌ្ឍប្រកបដោយចីរភាព និងសង្គម វប្បធម៌ និងការផ្លាស់ប្តូររវាងប្រជាជន និងប្រជា។ វិស័យអាទិភាពសំខាន់ៗ រួមមាន៖ ការតភ្ជាប់សមត្ថភាពផលិតកម្ម កិច្ចសហប្រតិបត្តិការសេដ្ឋ កិច្ចឆ្លងដែន ធនធានទឹក កសិកម្ម និងការកាត់បន្ថយភាពក្រីក្រ។

ភាពជាដៃគូមេគង្គ-សហរដ្ឋអាមេរិក ផ្តោតលើការតភ្ជាប់សេដ្ឋកិច្ច ការអភិវឌ្ឍធនធានមនុស្ស ការគ្រប់គ្រងទឹកឆ្លងដែន និងធនធានធម្មជាតិ និងសន្តិសុខមិនមែនប្រពៃណីរួមទាំងការគំរាមកំហែងដែលកំពុងកើតមានដូចជា៖ សន្តិសុខសុខភាព ការឆ្លើយតបនឹងជំងឺរាតត្បាត ការប្រឆាំងឧក្រិដ្ឋកម្មឆ្លងដែន សន្តិសុខ តាមអ៉ីនធឺណិត និងការប្រឆាំងការជួញដូរមនុស្ស គ្រឿងញៀន និងសត្វព្រៃ។

ការរីកសាយនៃក្របខណ្ឌកិច្ចសហប្រតិបត្តិការមេគង្គក្នុងទស្សវត្សរ៍មុនបានបន្ថែមភាពស្មុគស្មាញដល់ទំនាក់ទំនងទន្លេក្នុងតំបន់និងក្រៅតំបន់។ ដើម្បីធានាបាននូវផលចំណេញផ្នែកបរិស្ថាន សេដ្ឋកិច្ច និងសង្គមពីអតីតកាល ក្របខណ្ឌកិច្ចសហប្រតិបត្តិការជាច្រើនទាមទារឱ្យមានការសម្របសម្រួលកិច្ចសហការ និងការបំពេញបន្ថែមឱ្យគ្នាកាន់តែច្រើន។ ទោះជាយ៉ាងណាក៏ដោយទ្វេគ្រោះមួយកើតឡើងនៅពេលដែលក្របខ័ណ្ឌកិច្ចសហប្រតិបត្តិការមួយចំនួនមានរបៀបវារៈខាងនយោបាយ និងបណ្ដាលឱ្យមានការប្រកួតប្រជែង។ ល្បែងសាចទឹកដាក់គ្នាត្រូវបានគេប្រើជាញឹកញាប់ ខណៈពេលដែលការពិត និងតថភាពត្រូវបានគេទុកចោល៕

(សូមអានបន្ត)

ក្រុមការងារក្រសួងព័ត៌មាន កំពុងមមាញឹកក្នុងការរៀបចំមណ្ឌលព័ត៌មានកណ្តាល MPC សម្រាប់ការផ្សព្វផ្សាយព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣

ក្រុមការងារក្រសួងព័ត៌មាន កំពុងមមាញឹកក្នុងការរៀបចំមណ្ឌលព័ត៌មានកណ្តាល MPC សម្រាប់ការផ្សព្វផ្សាយព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣

រាជធានីភ្នំពេញ :ក្រុមការងារក្រសួងព័ត៌មាន កំពុងមមាញឹកក្នុងការរៀបចំមណ្ឌលព័ត៌មានកណ្តាល MPC សម្រាប់ការផ្សព្វផ្សាយព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ ដើម្បីឱ្យព្រឹត្តិការណ៍មួយនេះ បានប្រព្រឹត្តទៅដោយរលូន។

ឯកឧត្តម ខៀវ កាញារីទ្ធ រួមជាមួយក្រុមជំនាញបច្ចេកទេស នៃគណៈ កម្មការព័ត៌មាន និងផ្សព្វផ្សាយ បានអញ្ជើញចុះពិនិត្យទីតាំងមជ្ឈ មណ្ឌលផ្សាយអន្តរជាតិ IBC និង មណ្ឌលព័ត៌មានកណ្តាល MPC សម្រាប់ការផ្សព្វផ្សាយព្រឹត្តិការណ៍ប្រកួតកីឡាអាស៊ីអាគ្នេយ៍លើកទី ៣២ ឆ្នាំ២០២៣ នៅក្នុងបរិវេណ ពហុកីឡដ្ឋានជាតិ មរតកតេជោ សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ នៅព្រឹកថ្ងៃទី២៤ ខែមេសា ឆ្នាំ២០២៣។

ឯកឧត្តម រដ្ឋមន្រ្តី ខៀវ កាញារីទ្ធ អនុប្រធាន CAMSOC ដែលទទួលការងារសម្រាប់គណៈកម្មការព័ត៌មាន និងផ្សព្វផ្សាយ បានបញ្ជាក់ថា ក្រសួងព័ត៌មាន មានកិច្ចការដែលត្រូវទទួលខុសត្រូវធំ បន្ទាប់ពីសម្តេចតេជោនាយករដ្ឋមន្រ្តី ហ៊ុន សែន បានប្រកាសអនុញ្ញាតឱ្យប្រជាពលរដ្ឋខ្មែរ និងបរទេសទាំងអស់អាចចូលរួមទស្សនាដោយសេរី ដោយមិនគិតថ្លៃក្នុងពិធីបើក ពិធីបិទ និងរាល់ការប្រកួតគ្រប់វិញ្ញាសាកីឡាទាំងអស់ក្នុងព្រឹត្តិការណ៍កីឡាស៊ីហ្គេម ហើយលុបចោលការបង់ថ្លៃលើការស្នើសុំសិទ្ធិផ្សាយបន្តផ្ទាល់នូវព្រឹត្តិការណ៍កីឡាអាស៊ីអាគ្នេយ៍លើកទី៣២ និងអាស៊ានប៉ារ៉ាហ្គេមលើកទី១២ នៅព្រះរាជាណាចក្រកម្ពុជា ទៅកាន់បណ្តាប្រទេសសមាជិកអាស៊ាន និងប្រទេស នានាលើពិភពលោក ។

ឯកឧត្តមបន្ថែមថា ដូច្នេះសម្រាប់ការផ្សព្វផ្សាយព័ត៌មាន និងផ្សាយ បន្តផ្ទាល់ ត្រូវបានគណៈកម្មការព័ត៌មាន និងផ្សព្វផ្សាយរបស់ CAMSOC ដែលដឹកនាំដោយក្រសួងព័ត៌មាន កំពុងធ្វើការយ៉ាង សកម្មក្នុងក្របខ័ណ្ឌ បច្ចេកទេស ជាមួយបណ្តាស្ថានីយទូរទស្សន៍ក្នុងស្រុក ដោយគោរពតាមគោល ការណ៍របស់ក្រុមប្រឹក្សាសហព័ន្ធកីឡាអាស៊ីអាគ្នេយ៍ និងអនុសាសន៍ដ៏ខ្ពង់ខ្ពស់របស់សម្តេចតេជោនាយករដ្ឋមន្តី ក្នុងការផ្តល់សិទ្ធិផ្សាយដោយឥតមិនគិតថ្លៃ។

ឯកឧត្តម ផុស សុវណ្ណ ប្រតិភូរាជ រដ្ឋាភិបាលកម្ពុជាទទួលបន្ទុកជាអគ្គ នាយកនៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មាន និងជាប្រធានគណៈកម្មការព័ត៌មាន និងផ្សព្វផ្សាយនៃគណៈកម្មាធិការជាតិរៀបចំការប្រកួតកីឡាស៊ីហ្គេម បានបញ្ជាក់ថា រហូតមកដល់ពេល នេះ ក្រុមការងារតាមផ្នែក និងជំនាញនីមួយៗ បានកំពុងមមាញឹកក្នុងការរៀបចំមណ្ឌលព័ត៌មានកណ្តាល MPC សម្រាប់ការផ្សព្វ ផ្សាយព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ ហើយរាល់កិច្ចការងារប្រព្រឹត្តទៅដោយរលូន និងត្រៀមអនុវត្តន៍ឱ្យបានល្អ ។

លោក ជា លីប៊ុនសៀង នាយកប្រតិបត្តិក្រុមហ៊ុន CSTV រួមជា មួយក្រុមការងារជំនាញបច្ចេកទេសរបស់សាធារណរដ្ឋកូរ៉េ ក៏បានឱ្យដឹងថា សម្រាប់មជ្ឈមណ្ឌលផ្សាយអន្តរ ជាតិ IBC កំពុងដំណើរការរៀបចំសម្ភារៈបរិក្ខារ បច្ចេកទេសស្ទើររួច រាល់ទាំងស្រុង និងបន្តឱ្យរួចសម្រាប់ត្រៀមផ្សព្វផ្សាយការប្រកួតកីឡា SEA Games- ASEAN Para Games ។  មជ្ឈមណ្ឌលផ្សាយអន្តរជាតិ ហៅកាត់ថា IBC គឺទទួលបានសិទ្ធិពីគណៈកម្មាធិការជាតិ CAMSOC ដោយទទួលខុសត្រូវក្នុងការផលិតកម្មវិធីប្រកួតកីឡា ១១ ប្រភេទ ក្នុងព្រឹត្តការណ៍នៃការប្រកួតកីឡា SEA Games- ASEAN Para Games ហើយ ៤ ប្រភេទកីឡាទៀតផលិតដោយក្រុមហ៊ុន GSTV និង១ប្រភេទផលិត ដោយESport របស់ក្រុមហ៊ុនវៀតណាម ។

លោកនាយកក្រុមហ៊ុន CSTV បានបញ្ជាក់ថា ប្រភេទកីឡាទាំង ១៦ ខាងលើនេះ គឺធ្វើឡើងតែនៅរាជធានីភ្នំពេញ ហើយសម្រាប់កម្មវិធីប្រកួតនៅតាមខេត្ត គឺក្រុម ហ៊ុន មិនមានការទទួលខុសត្រូវក្នុងការផលិតនោះទេ ។ អ្វីដែលសំខាន់ពាក់ពន្ធ័ការផ្សាយពាណិជ្ជកម្ម គឺក្រុមហ៊ុន CSTV ក៏មិនមានសិទ្ធិទទួលខុសត្រូវនោះទេ គឺទទួលតែកម្មវិធីកីឡាតែ ១១ ប៉ុណ្ណោះ។ សម្រាប់វឌ្ឍនភាពការងាររបស់ក្រុមហ៊ុន CSTV បានធ្វើមកដល់ ពេលនេះ គឺបានរៀបចំស្តង់ Booth រួចរាល់ហើយ ដោយក្នុងនោះ ក្រុមហ៊ុន បានផ្តល់ Booth ១ កន្លែងសម្រាប់ទូរទស្សន៍ជាតិកម្ពុជា ដើម្បីបំពេញការងារ ៕

 

(សូមអានបន្ត)

ឯកឧត្ដម សាយ សំអាល់ និងលោកជំទាវ បរិច្ចាគថវិកា ១ម៉ឺនដុល្លារ ក្នុងឱកាសខួបទី១៦០ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ២០២៣

  ឯកឧត្ដម សាយ សំអាល់ និងលោកជំទាវ បរិច្ចាគថវិកា ១ម៉ឺនដុល្លារ ក្នុងឱកាសខួបទី១៦០ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ២០២៣

(ភ្នំពេញ)៖ ឯកឧត្ដម សាយ សំអាល់ និងលោកជំទាវ បានបរិច្ចាគថវិកាចំនួន ១ម៉ឺនដុល្លារអាមេរិក ចូលរួមជាមួយកាកបាទក្រហមកម្ពុជា ក្នុងឱកាសខួបទី១៦០ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២៣។

ឯកឧត្ដម សាយ សំអាល់ និងលោកជំទាវ តែងតែចូលរួមបរិច្ចាគថវិកាជារៀងរាល់ឆ្នាំ ជាមួយកាកបាទក្រហមកម្ពុជាក្នុងឱកាសខួបទី១៦០ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ហើយក៏តែងតែបានចូលរួមឧបត្ថម្ភថវិកាជួយដល់យុទ្ធនាការផ្សេងៗ របស់ប្រមុខរាជរដ្ឋាភិបាល ព្រមទាំងបានចូលរួមជួយឧបត្ថម្ភដល់កម្មវិធីសប្បុរសជាច្រើនទៀត។

សូមជម្រាបថា សម្រាប់សប្បុរសជនគ្រប់មជ្ឈដ្ឋានដែលមានសទ្ធាជ្រះថ្លាចូលរួមបរិច្ចាគថវិកា ជូនកាកបាទក្រហមក្រហមកម្ពុជា ក្នុងឱកាសខួបលើកទី១៦០ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ២០២៣ ដើម្បីឱ្យសមាគមជាតិមួយនេះមានធនធានបន្តផ្តល់សេវាកម្មមនុស្សធម៌ ដោះស្រាយបញ្ហាប្រឈមនានា បន្តពង្រឹងភាពធន់សហគមន៍ និងជួយសម្រាលទុក្ខលំបាកប្រជាពលរដ្ឋរងគ្រោះ និងងាយរងគ្រោះបំផុតតាមគោលការណ៍គ្រឹះរបស់ចលនាអន្តរជាតិកាកបាទក្រហម និងអឌ្ឍចន្ទក្រហម។

សូមអញ្ជើញទៅទីស្នាក់ការកណ្ដាលកាកបាទក្រហមកម្ពុជា ឬសូមវេរចូលគណនីធនាគាររបស់កាកបាទក្រហមកម្ពុជា នៅធនាគារពាណិជ្ជកម្មក្រៅប្រទេសនៃកម្ពុជា ដែលមានលេខគណនីដូចខាងក្រោម៖

* ប្រាក់រៀល៖ 100004348127

* ប្រាក់ដុល្លារអាមេរិក៖ 300001709996

ធនាគារវឌ្ឍនៈអាស៊ីចំកាត់ (ABA)៖

* គណនីឈ្មោះ៖ PUM CHANTINIE AND MEN NEARY SOPHEAK AND LIM SAY

* គណនីប្រាក់រៀល៖ 180 255 333

* គណនីប្រាក់ដុល្លារអាមេរិក៖ 180 255 168

ចំពោះព័ត៌មានលម្អិត សូមទំនាក់ទំនង៖

* លោកជំទាវ ពុំ ចន្ទីនី លេខទូរស័ព្ទ៖ ០១២ ៩២១ ១០៥

* លោកជំទាវ មែន នារីសោភ័គ លេខទូរស័ព្ទ៖ ០១២ ៨១០ ៨៥៤

* ឯកឧត្តម ឌួង អេលីត លេខទូរស័ព្ទ៖ ០១៧ ២៤៨ ៨៨៨

(សូមអានបន្ត)

ប្រសាសន៍សំខាន់ៗរបស់សម្តេច​តេជោ ហ៊ុន សែន ឱកាសអញ្ជើញជាអធិបតីពិធីកាត់ប្ញសសីមា ព្រះវិហារ ព្រះពុទ្ធ បដិមា និងសមិទ្ធផលនានា​ក្នុងវត្តព្រះបារមីវង្កតបុរី

(ភ្នំពេញ)៖ នៅព្រឹកថ្ងៃចន្ទ ទី២៤ ខែមេសា ឆ្នាំ២០២៣នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាតក្រហមកម្ពុជា បានអញ្ជើញជាអធិបតីបុណ្យបញ្ចុះខណ្ឌសីមា​ព្រះវិហារ ពុទ្ធាភិសេក និងឆ្លងសមិទ្ធផលនានាក្នុងវត្តព្រះបារមីវង្កតបុរី ស្ថិតនៅ​សង្កាត់​ទឹកថ្លា ខណ្ឌសែនសុខ រាជធានីភ្នំពេញ។

ព្រះវិហារ និងសមិទ្ធផលទាំងឡាយនៅក្នុងវត្តព្រះបារមីវង្គតបុរី គឺជាកេរមរតក​ដ៏ថ្លៃ​ថ្លា​​​របស់អ្នកឧកញ៉ា មហាភក្តីសប្បុរិសភោគាធិបតី ហ៊ុន នាង និងមហាឧបា​សិកា ឌី ប៉ុក ដែលជាបិតា និងមាតាបង្កើតរបស់សម្តេចតេជោនាយករដ្ឋមន្ត្រី។

ខាងក្រោមជាខ្លឹមសារសំខាន់ៗរបស់សម្តេចតេជោ ហ៊ុន សែន៖

* សម្តេចតេជោ ហ៊ុន សែន ថ្លែងអំណរគុណ និងកោតសរសើរអភិបាលរាជធានី ក៏ដូចជាព្រះចៅអធិការ និងគណៈកម្មការវត្ត ដែលបានខិតខំរួមគ្នាកសាងវត្តព្រះបារមីវង្កតបុរី ហៅវត្តទួលក្រសាំងឡើងវិញ។

* សម្តេចតេជោ ហ៊ុន សែន បានថ្លែងថា សាសនានៅកម្ពុជាមិនមានសាសនាណាបង ឬប្អូននោះទេ ព្រោះសាសនាទាំងអស់ត្រូវបានរស់ឡើងវិញដំណាលគ្នាក្រោយថ្ងៃរំដោះ៧ មករា ឆ្នាំ១៩៧៩។

* សម្តេចតេជោ ហ៊ុន សែន បានថ្លែងថា របបខ្មែរក្រហមអាចលុបបំបាត់ហេដ្ឋរចនាសម្ព័ន្ធផ្នែកសាសនា តែមិនអាចលុបជំនឿក្នុងចិត្តរបស់ប្រជាពលរដ្ឋបាននោះឡើយ។

* សម្តេចតេជោ​ ហ៊ុន សែន បានថ្លែងថា វត្តវង្កតបុរី ក្លាយទៅជាទីអារាម​សម្រាប់ត្រកូល «ហ៊ុន» និងត្រកូល «ឌី» ព្រោះបិតា មាតា ព្រមទាំងបងស្រីសាច់ថ្លៃរបស់សម្តេចតេជោ ត្រូវបានបញ្ចុះ និងបូជានៅទីនេះ។

* សម្តេចតេជោ ហ៊ុន សែន រំពឹងថា កូនចៅត្រកូល «ហ៊ុន» និងត្រកូល «ឌី» នឹងមិនបោះបង់វត្តព្រះបារមីវង្កតបុរីនោះទេ ហើយបន្តជួយជ្រោមជ្រែងគាំទ្រដល់វត្តនេះរហូតទៅ។

* សម្តេចតេជោ ហ៊ុន សែន បានថ្លែងថា នៅឆ្នាំនេះជាខួប ២៥ឆ្នាំ នៃមរណភាពមាតាសម្តេច, ខួប ១០ឆ្នាំនៃមរណភាពបិតា និងជាខួប ១០០ឆ្នាំថ្ងៃកំណើតរបស់បិតាសម្តេចផងដែរ។

* សម្តេចតេជោ ហ៊ុន សែន បានសម្រេចជ្រើសយកថ្ងៃទី១២ ខែកក្កដា ឆ្នាំ២០២៣នេះ ជាថ្ងៃបុណ្យខួបនៃមរណភាពបិតារបស់សម្តេច។

* សម្តេចតេជោ ហ៊ុន សែន បានថ្លែងថា ទោះបីថ្ងៃទី១២ ខែកក្កដា ចំពេលដំណើរការបោះឆ្នោតនៅកម្ពុជាយ៉ាងណាក្តី តែសម្តេចមិនអាចបោះបង់ពិធីបុណ្យសម្រាប់បិតា និងមាតានោះឡើយ។

* សម្តេចតេជោ ហ៊ុន សែន បានថ្លែងភ្ញាក់ផ្អើល និងមិននឹកស្មានថា ល្ខោនទទួលបានការចាប់អារម្មណ៍ពីសំណាក់ប្រជាពលរដ្ឋក្នុងទីក្រុង។

* សម្តេចតេជោ ហ៊ុន សែន បានថ្លែងថា ការកសាងវត្តព្រះបារមីវង្កតបុរី មិនសម្រាប់តែត្រកូល «ហ៊ុន» និងត្រកូល «ឌី» ប៉ុណ្ណោះទេ តែសម្រាប់ប្រជាពលរដ្ឋទូទៅផងដែរ។

* សម្តេចតេជោ ហ៊ុន សែន បានថ្លែងថា មាននិស្សិតខ្មែរ-ឥស្លាម ៦នាក់ កំពុងស្នាក់នៅក្នុងប្រទេសស៊ូដង់ខាងត្បូង ដែលកំពុងជួបវិបត្តិនយោបាយ និងសង្គ្រាម។ សម្តេចតេជោ ហ៊ុន សែន កំពុងតាមដាន និងពិចារណាជម្លៀសពួកគេចេញពីស៊ូដង់ខាងត្បូង។

* សម្តេចតេជោ ហ៊ុន សែន បានថ្លែងថា កម្ពុជាអាចប្រារព្ធពិធីបុណ្យទាន និងបុណ្យចូលឆ្នាំយ៉ាងសប្បាយរីករាយ ដោយសារតែប្រទេសមានសុខសន្តិភាព គ្មានភ្លើងសង្គ្រាម។

* សម្តេចតេជោ ហ៊ុន សែន បានថ្លែងថា នៅពេលប្រជាពលរដ្ឋមានជីវភាពល្អ​ប្រសើរ ទីអារាមក៏មានការរីកចម្រើនផងដែរ។

* សម្តេចតេជោ ហ៊ុន សែន បានថ្លែងថា ពុទ្ធចក្រក៏បានផ្តល់នូវការអប់រំផ្នែកសីលធម៌ និងគុណធម៌ដល់ប្រជាពលរដ្ឋឱ្យប្រព្រឹត្តនូវសេចក្តីល្អ។

* សម្តេចតេជោ ហ៊ុន សែន បានថ្លែងថា អាណាចក្រ និងពុទ្ធចក្រ ជាចំណងទាក់ទងគ្នាមិនអាចកាត់ផ្តាច់គ្នាបាននោះឡើយ។

* សម្តេចតេជោ ហ៊ុន សែន សម្រេចប្រគេនបច្ច័យបានពីពិធីបុណ្យជាង ៨០លានរៀល ទៅព្រះចៅអធិការវត្តព្រះបារមីវង្កតបុរី ដើម្បីកសាងសមិទ្ធផលដទៃទៀត។

* សម្តេចតេជោ ហ៊ុន សែន បានថ្លែងថា អ្នកខ្លះស្រមៃចង់ធ្វើនាយករដ្ឋមន្ត្រីស្ទើរស្លាប់ តែមិនបានធ្វើ។ ដោយឡែកសម្តេច មិនដែលចង់ធ្វើនាយករដ្ឋមន្ត្រី តែបានក្លាយជានាយករដ្ឋមន្ត្រីដែលយូរជាងគេលើពិភពលោក។

* សម្តេចតេជោ ហ៊ុន សែន បានថ្លែងថា សេរីភាពរបស់សម្តេចជាច្រើន ត្រូវបានបង់ ព្រោះកម្លាំងការពារ ពេលអញ្ជើញទៅកម្មវិធីផ្សេងៗ។

* សម្តេចតេជោ ហ៊ុន សែន បានឱ្យដឹងថា ក្រុមហ៊ុនប៊ូយ៉ុងថោន នឹងសាងសង់សាកលវិទ្យាល័យមួយនៅក្បែរវត្តទួលក្រសាំង។

* សម្តេចតេជោ ហ៊ុន សែន បានថ្លែងថា រដ្ឋចំណាយប្រមាណ ៧លានដុល្លារបន្ថែម សម្រាប់ការស្នាក់នៅ និងហូបចុករបស់គណៈប្រតិភូកីឡាស៊ីហ្គេម។

(សូមអានបន្ត)