អាវុធហត្ថរាជធានីភ្នំពេញ តាមចាប់បុរសម្នាក់មានវិជ្ជមានកូវីដ១៩ ដែលគេចវេសពីការព្យាបាល

 

 ភ្នំពេញ: ថ្ងៃទី៣១ ខែឧសភា ឆ្នាំ២០២១  នៅរសៀល ថ្ងៃទី៣០ ខែឧសភា ឆ្នាំ២០២១ នេះ មានបុរសម្នាក់ បានទៅយកសំណាក នៅមណ្ឌលសុខភាពគោករកា ខណ្ឌព្រែកព្នៅ រកឃើញវិជ្ជមានកូវីដ-១៩ ក៏បានធ្វើការគេចខ្លួន ដោយមិនទទួលយកការព្យាបាល បើទោះបីជាក្រុមគ្រូពេទ្យបានព្យាយាមបញ្ចុះបញ្ចូល ពន្យល់ហេតុផលយ៉ាងណាក៏ដោយ។

បន្ទាប់ពីបានទទួលការស្នើសុំ ឲ្យជួយអន្តរាគមន៍ពីក្រុមគ្រូពេទ្យ កម្លាំង គ-អន្តរាគមន៍ កងរាជអាវុធហត្ថរាជធានីភ្នំពេញ និង អាវុធហត្ថខណ្ឌព្រែកព្នៅ សហការជាមួយក្រុមគ្រូពេទ្យក្រសួងសុខាភិបាល បានចេញ ដេញតាមមុខសញ្ញារហូតដល់ចំណុច វាលស្រែមួយកន្លែង ក្នុងភូមិជ្រេស សង្កាត់គោករកា ខណ្ឌព្រែកព្នៅ ពេលនោះសមត្ថកិច្ចនិងក្រុមគ្រូពេទ្យបានព្យាយាមពន្យល់ ណែនាំបុរសរូបនោះ យល់អំពីសារៈប្រយោជន៍នៃការព្យាបាលព្រមទាំងទោសទណ្ឌនៃការគេចវេស តែបុរសរូបនោះនៅតែមិនព្រម ស្ម័គ្រចិត្តទទួលយកការព្យាបាល ថែមទាំងរើសដុំថ្ម ព្យាយាមវាយប្រហារមកលើសត្ថកិច្ចថែមទៀតផង ដោយមានការហ៊ុព័ទ្ធនិងបង្ខំ ពីសមត្ថកិច្ច បុរសនោះក៏ព្រមឡើងរថយន្តជាមួយ ក្រុមគ្រូពេទ្យ ដើម្បីទៅធ្វើការព្យាបាល នៅមណ្ឌលសម្រាកព្យាបាលជំងឺកូវីដ-១៩ កម្រិតស្រាល វិទ្យាល័យ ហ៊ុន សែន បុរី១០០ខ្នង។

បុរសខាងលើនោះមានឈ្មោះ ជា គា ភេទ ប្រុសអាយុ ៣៩ឆ្នាំ ស្នាក់នៅភូមិគោកឃ្លាង សង្កាត់គោកឃ្លាង ខណ្ឌសែនសុខ រាជធានីភ្នំពេញ។

យោងតាមច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ១៩ និងជំងឺឆ្លងកាចសាហាវ ប្រកបដោយគ្រោះថ្នាក់ធ្ងន់ធ្ងរផ្សេងទៀត ករណីគេចវេសពីការព្យាបាលនេះ ត្រូវប្រឈមនឹង ការផ្តន្ទាទោសដាក់ពន្ធាគាពី ១ឆ្នាំ ទៅ ៥ឆ្នាំ និងពិន័យជាប្រាក់ពី ៥លានរៀល ទៅ ២០លានរៀល តែបើ មានការចម្លងដល់អ្នកដទៃ នឹងត្រូវផ្តន្ទាទោសដាក់ពន្ធនាគារពី ៥ឆ្នាំ ទៅ ១០ឆ្នាំ ជាមិនខាន។

អាវុធហត្ថរាជធានីភ្នំពេញ សូមធ្វើការអំពាវនាវម្តងហើយម្តងទៀត ដល់បងប្អូនប្រជាពលរដ្ឋដែល វិជ្ជមានជំងឺកូវីដ-១៩ សូមមេត្តាចូលរួមអនុវត្តតាមវិធានការព្យាបាល របស់ក្រសួងសុខាភិបាល ដោយការ អត់ធ្មត់ដើម្បីឲ្យជាសះស្បើយ ជៀសវាងរត់គេចដែលអាចនាំទុក្ខដល់សុខភាពខ្លួនផង នាំទុក្ខដល់អ្នកដ៏ទៃក្នុងក្រុមគ្រួសារនិងសហគមន៍ផង និង ត្រូវមានទោសទណ្ឌ ជាប់ពន្ធនាគាររយៈពេលវែងផងដែរ៕

(សូមអានបន្ត)

មន្ត្រីជាន់ខ្ពស់ក្រសួងសេដ្ឋកិច្ច ចុះសង្កេតមើលដំណើរការនៃការកំណត់អត្តសញ្ញាណគ្រួសារ មានការលំបាកផ្នែកជីវភាព ក្រោយពេលបិទខ្ទប់

 

(ភ្នំពេញ)៖ ក្រោយពេលក្រុមប្រឹក្សាជាតិគាំពារសង្គម បានចេញសេចក្ដីសម្រេចលេខ ០២៣ ចុះថ្ងៃទី១៣ ខែឧសភា ឆ្នាំ២០២១ ស្ដីពីយន្តការ និងនីតិវិធីនៃការអនុវត្តកម្មវិធីជំនួយសង្គម ជាសាច់ប្រាក់ក្រោយពេលបិទខ្ទប់សម្រាប់ប្រជាពលរដ្ឋ និងគ្រួសារប្រជាពលរដ្ឋមានការលំបាកផ្នែកជីវភាព, ប្រជាពលរដ្ឋ និងគ្រួសារប្រជាពលរដ្ឋ ដែលមានអ្នកឆ្លងជំងឺកូវីដ-១៩ និងមានការលំបាកផ្នែកជីវភាព និងគ្រួសារប្រជាពលរដ្ឋ ដែលមានអ្នកស្លាប់ដោយសារជំងឺកូវីដ-១៩ ក្នុងព្រឹត្តិការណ៍ ២០ កុម្ភៈ ២០២១, ក្រុមការងារមកពីក្រសួងស្ថាប័នពាក់ព័ន្ធ អាជ្ញាធរមូលដ្នាន ជាពិសេសរដ្ឋបាលសង្កាត់នានា និងក្រុមយុវជនស្ម័គ្រចិត្ត នៃសហភាពសហព័ន្ធយុវជនកម្ពុជា (ស.ស.យ.ក) បានសហការចុះសម្ភាស ដើម្បីកំណត់អត្តសញ្ញាណគ្រួសារគោលដៅ នៅក្នុងតំបន់ដែលធ្លាប់ ត្រូវបានអនុវត្តវិធានការបិទខ្ទប់ជាលក្ខណៈទ្រង់ទ្រាយធំ នាពេលកន្លងមក ជាបន្តបន្ទាប់ ដើម្បីធានាថា ពួកគាត់នឹងទទួលបានការឧបត្ថម្ភពីកម្មវិធីជំនួយសង្គម ជាសាច់ប្រាក់របស់រាជរដ្ឋាភិបាល។
ដោយមានការណែនាំរបស់ អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាជាតិគាំពារសង្គម, បណ្ឌិត ចន ណារិទ្ធ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការក្រុមប្រឹក្សាជាតិគាំពារសង្គម បានចូលរួមជាមួយតំណាងក្រសួងស្ថាប័ន ដែលរួមមានក្រសួងសង្គមកិច្ច អតីតយុទ្ធជន និងយុវនីតិសម្បទា, ក្រសួងផែនការ ព្រមទាំងតំណាងដៃគូអភិវឌ្ឍន៍ពាក់ព័ន្ធ ចុះទៅភូមិសាស្ត្រនានា ក្នុងរាជធានីភ្នំពេញ នៅថ្ងៃទី២៤ ខែឧសភា ឆ្នាំ២០២១ ដើម្បីសង្កេតមើលដំណើរការ នៃការកំណត់អត្តសញ្ញាណគ្រួសារគោលដៅ ដែលនឹងត្រូវទទួលបានការឧបត្ថម្ភ ពីកម្មវិធីជំនួយសង្គមជាសាច់ប្រាក់ របស់រាជរដ្ឋាភិបាល។
បន្ទាប់ពីបេសកកម្មនៅរាជធានីភ្នំពេញ, នៅថ្ងៃទី២៧ ខែឧសភា ឆ្នាំ២០២១ បណ្ឌិត ចន ណារិទ្ធ និងក្រុមការងារអន្តរក្រសួង បានបន្តបេសកកម្មសង្កេតមើលដំណើរការ នៃការកំណត់អត្តសញ្ញាណគ្រួសារគោលដៅនេះ នៅក្នុងតំបន់ដែលធ្លាប់ ត្រូវបានអនុវត្តវិធានការបិទខ្ទប់ជាលក្ខណៈទ្រង់ទ្រាយធំ នៅក្រុងព្រះសីហនុនៃខេត្តព្រះសីហនុ ដោយមានការអញ្ជើញចូលរួមពីលោក ឈឹន សេងងួន អភិបាលរងខេត្តព្រះសីហនុ, ប្រធានមន្ទីរផែនការ និងមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត។
ក្នុងការបំពេញបេសកកម្មសង្កេតវឌ្ឍនភាពការងារនេះ ក្រុមការងារបានជម្រាបជូន ក៏ដូចជាបំភ្លឺនូវគោលការណ៍ និងវិធីសាស្ត្រលម្អិត និងបានជំរុញការពន្លឿនការអនុវត្តនីតិវិធី ដើម្បីឈានទៅបើកផ្តល់ការឧបត្ថម្ភឱ្យបានទាន់ពេលវេលា សំដៅជួយដោះស្រាយការលំបាកផ្នែកជីវភាព ដែលជាគោលបំណងនៃកម្មវិធីជំនួយសង្គមជាសាច់ប្រាក់ របស់រាជរដ្ឋាភិបាលនេះ៕

(សូមអានបន្ត)

តម្លៃសេវាទឹកកខ្វក់នឹងបញ្ចូលក្នុងវិក្កយបត្រតែមួយជាមួយទឹកស្អាត

 

តម្លៃសេវាទឹកកខ្វក់ នឹងត្រូវបញ្ចូលក្នុងវិក្កយបត្រតែមួយជាមួយទឹកស្អាត បន្ទាប់ពីក្រសួង ស្ថាប័ន និងភាគីពាក់ព័ន្ធ ឯកភាពគ្នាជាធ្លុងមួយក្នុងការដាក់ឱ្យអនុវត្តនូវសេវាកម្មនេះ។ ឯកឧត្តម កឹម បូរី អនុរដ្ឋលេខា ធិការក្រសួងសាធារណការ និងដឹកជញ្ជូន និងជាប្រធានគ្រប់គ្រង និងសម្របសម្រួលគម្រោងអភិវឌ្ឍន៍សមត្ថភាពសម្រាប់ការងារគ្រប់គ្រងទឹកកខ្វក់ មានប្រសាសន៍ថា ការដាក់ បញ្ចូលតម្លៃសេវាទឹកកខ្វក់ទៅក្នុងវិក្កយបត្រទឹកស្អាត គឺជាយន្តការមួយ ដែលនឹងរួមចំណែកដល់ការធានាបាននូវនិរន្តរភាព នៃការវិនិយោគលើវិស័យនេះ។ ការថ្លែងបញ្ជាក់នេះ បានធ្វើឡើងក្នុងកិច្ចប្រជុំបូកសរុបស្តីពីបេសកកម្មគាំទ្រដល់ការងារអនុវត្តគម្រោងលើកទី៤នៃ គម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ក្រោមហិរញ្ញប្បទានសម្បទានរបស់ធនាគារពិភពលោក ដែលរៀបចំឡើងដើម្បីពិនិត្យពិភាក្សា លើយន្តការកំណត់ និងការប្រមូលថ្លៃសេវាប្រើប្រាស់ប្រព័ន្ធលូ និងប្រព័ន្ធចម្រោះទឹកកខ្វក់ សំដៅធានាដល់ការទ្រទ្រង់លើការវិនិយោគក្នុងវិស័យនេះ និងជំរុញប្រតិបត្តិការ និងថែទាំប្រព័ន្ធចម្រោះទឹកកខ្វក់ ប្រកបដោយសមធម៌និរន្តរភាព ជាពិសេសក្នុងគោលបំណងចូលរួមថែរក្សាអនាម័យ សុខភាពសាធារណៈ ព្រមទាំងលើកកម្ពស់សោភ័ណភាព និងកែលម្អបរិស្ថានធម្មជាតិ។ អង្គប្រជុំដែលមានការចូលរួមពីមន្ត្រីជាន់ខ្ពស់ក្រសួងសាធារណការ និងដឹកជញ្ជូន និង មន្រ្តីគម្រោងក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវា នុវត្តន៍ តំណាងក្រសួងសេដ្ឋកិច្ច និងហរិញ្ញវត្ថុ តំណាងធនាគារពិភពលោក និងភាគីពាក់ព័ន្ធ បាន ពិនិត្យទៅលើការងារបច្ចេកទេស កិច្ចការលទ្ធកម្ម កិច្ចការ ហិរញ្ញវត្ថុ កិច្ចគាំពារបរិស្ថាននិងសង្គម ដែលបានអនុវត្តកន្លងមក បញ្ហាប្រឈម និងដំណោះស្រាយ ដើម្បីជំរុញការអនុវត្តន៍នូវសកម្មភាពការងារនៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យទៅតាមផែនការដែលគ្រោងទុក។ សូមបញ្ជាក់ថា ក្រសួងសាធារណការ និងដឹកជញ្ជូន ក៏បាននិងកំពុងរៀបចំសេចក្តីព្រាងច្បាប់ស្តីពីទឹកកខ្វក់ និងប្រព័ន្ធលូ ក្នុងគោលបំណងថែរក្សាអនាម័យបរិស្ថាន ធ្វើឱ្យប្រសើរឡើងដល់ការគ្រប់គ្រងទឹកកខ្វក់ ព្រមទាំងរៀបចំចម្រោះទឹកកខ្វក់ និងប្រព័ន្ធលូនៅក្នុងគម្រោងអភិវឌ្ឍន៍ និងការសាងសង់ហេដ្ឋារចនាសម្ព័ន្ធនានា ឱ្យស្របតាមកម្រិតបទបញ្ញត្តិបច្ចេកទេស និងស្តង់ដារបរិស្ថាន៕វិទ្យុជាតិកម្ពុជា , វ៉ាង ភក្តី ២៨ ០៥ ២០២១

(សូមអានបន្ត)

មន្ទីរអង្គភាពជុំវិញខេត្ត នាំយកថវិកាប្រគល់សាខាកាកបាទក្រហមកម្ពុជាខេត្តកណ្ដាល

 

(កណ្តាល): ថ្ងៃទី២៧ ខែឧសភា ឆ្នាំ២០២១ នៅរសៀលថ្ងៃទី២៦ ខែឧសភា ឆ្នាំ២០២១ ឯកឧត្តម គង់ សោភ័ណ្ឌ អភិបាលខេត្តកណ្តាល និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត បានអញ្ជើញទទួលថវិកា ពីមន្ទីរអង្គភាពមួយចំនួនជុំវិញខេត្ត និងសប្បុរសជន ជូនដល់សាខាកាកបាទក្រហមកម្ពុជាខេត្តកណ្តាល ក្នុងគោលបំណងចូលរួមចំណែកទ្រទ្រង់ដល់សកម្មភាពមនុស្សធម៌របស់កាកបាទក្រហមកម្ពុជា ពិសេសគឺក្នុងខួបលើកទី១៥៨ ទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ឆ្នាំ២០២១ ក្រោមប្រធានបទ "ទាំងអស់គ្នារួមគ្នាជាមួយកាកបាទក្រហមកម្ពុជា ប្រយុទ្ធជំងឺកូវីដ-១៩ និងកសាងភាពធន់របស់សង្គមជាតិ"។

ឯកឧត្តម គង់ សោភ័ណ្ឌ បានថ្លែងអំណរគុណដល់មន្ទីរ អង្គភាពទាំងអស់ និងសប្បុរសជន ដែលបាននាំយកថវិកាប្រគល់ជូនសាខាកាកបាទក្រហមកម្ពុជាខេត្តកណ្ដាល នៅពេលនេះ។ ថវិកាដែលបានផ្ដល់ជូននៅពេលនេះ គឺពិតជាមានតម្លៃ និងឆ្លើយតបបានទាន់ពេលវេលាក្នុងកាលៈទេសៈដែលខេត្តកណ្ដាល កំពុងប្រយុទ្ធប្រឆាំងនឹងជំងឺកូវីដ-១៩ ដែលបានរីករាលដាលនៅទូទាំងខេត្តកណ្ដាល ហើយតំបន់មួយចំនួន ត្រូវបានសម្រេចបិទខ្ទប់ ដោយមិនអនុញ្ញាតឱ្យប្រជាពលរដ្ឋចេញពីផ្ទះ និងបន្លាស់ទីពីផ្ទះមួយទៅផ្ទះមួយ ឬពីភូមិមួយទៅភូមិមួយឡើយ។ ដូច្នេះអំណោយទាំងអស់នេះ គឺពិតជាទាន់ពេលវេលា ក្នុងការជួយប្រជាពលរដ្ឋ ដែលកំពុងប្រឈមទៅនឹងការខ្វះស្បៀងអាហារផងដែរ។

អំណោយទាំងនោះរួមមាន៖ ទី១.សាខាពន្ធដាខេត្តកណ្តាល ថវិកាចំនួន ២លានរៀល។ ទី២.មន្ទីរការងារ និងបណ្ដុះបណ្ដាលវិជ្ជាជីវៈខេត្តកណ្ដាល ថវិកាចំនួន ២.០០០ដុល្លារអាម៉េរិក ។ ទី៣.មន្ទីរកសិកម្ម រុក្ខាប្រមាញ់ និងនេសាទខេត្តកណ្ដាល ថវិកាចំនួន ១.៥០០ដុល្លារអាម៉េរិក ។ ទី៤.រដ្ឋបាលព្រៃឈើកណ្ដាល ថវិកាចំនួន ១.០០០ដុល្លារអាម៉េរិក ។ ទី៥. រដ្ឋបាលជលផលកណ្ដាល ថវិកាចំនួន ១.០០០ដុល្លារអាម៉េរិក ។ ទី៦.មន្ទីរវប្បធម៌និងវិចិត្រសិល្បៈខេត្តកណ្ដាល ថវិកាចំនួន ២លាន ៤សែនរៀល។ ទី៧.មន្ទីរមុខងារសាធារណៈខេត្តកណ្ដាល ថវិកាចំនួន ២ លាន ៤សែនរៀល។ ទី៨.លោកឧញ៉ា សុខ ស្រស់ ថវិកាចំនួន ៣.០០០ដុល្លារអាម៉េរិក ។ ទី៩.ឯកឧត្ដម អ៊ុក ដាមរី ថវិកាចំនួន ២លានរៀល៕

 (ប្រភពៈ រដ្ឋបាលខេត្តកណ្តាល)

(សូមអានបន្ត)

ប្រទេសថៃរាយការណ៍ករណីអ្នកស្លាប់ច្រើនបំផុតប្រចាំថ្ងៃដោយសារជំងឺកូវីដ-១៩

 (ភ្នំពេញ):​ថ្ងៃទី ២៧ ខែឧសភា ឆ្នាំ ២០២១  កាលពី​ថ្ងៃទី ២៦ ខែឧសភា ប្រទេស​ថៃ​បាន​រាយការណ៍​ថា​មាន​អ្នកស្លាប់​ថ្មី​ដោយសារ​ជំងឺ​កូ​វីដ​១៩ ចំនួន ៤១​នាក់ ដែលជា​ចំនួន​អ្នកស្លាប់​ប្រចាំថ្ងៃ​ខ្ពស់បំផុត​ចាប់តាំងពី​ការផ្ទុះ​ឡើង​នៃ​ជំងឺ​រាតត្បាត​នេះ ដែល​បានធ្វើឱ្យ​ចំនួន​អ្នកស្លាប់​សរុប​កើន​ដល់ ៨៧៣​នាក់​។​

​ប្រទេស​នេះ​ក៏បាន​រាយការណ៍​ផងដែរ​អំពី​ករណី​ឆ្លង​ថ្មី​ចំនួន ២ ៤៥៥​នាក់ ដែលនាំឱ្យ​ចំនួន​ករណី​ជំងឺ​កូ​វីដ​-១៩ សរុប​ឡើងដល់ ១៣៧ ៨៩៤​នាក់​។​

​ព្រះមហាក្សត្រ​នៃ​ប្រទេស​ថៃ​បានអនុម័ត​ទៅលើ​ក្រឹត្យ​មួយ​ដែល​អនុញ្ញាតឱ្យ​រដ្ឋាភិបាល​ខ្ចីប្រាក់​រហូតដល់ ៥០០​ប៊ី​លាន​បាត (១៥,៩៥​ប៊ី​លាន​ដុល្លារ​អាម៉េរិក​) ដើម្បី​គាំទ្រ​ដល់​កិច្ចខិតខំ​ប្រឹងប្រែង​ក្នុងការ​ប្រយុទ្ធ​ប្រឆាំងនឹង​ជំងឺ​កូ​វីដ​-១៩ ។​

​វា​អនុញ្ញាតឱ្យ​រដ្ឋាភិបាល​ចេញ​ប័ណ្ណបំណុល ឬ​ប័ណ្ណ​ខ្ចីប្រាក់​ជា​រូបិយប័ណ្ណ​បាត ឬ​រូបិយប័ណ្ណ​បរទេស​ក្នុង​ចំនួន​ទឹកប្រាក់​សរុប​រហូតដល់ ៥០០​ប៊ី​លាន​បាត ដែល​តិចជាង​ចំនួន ៧០០​ប៊ី​លាន​បាត​ដែល​ត្រូវបាន​អនុម័ត​ដោយ​គណៈរដ្ឋមន្ត្រី​កាលពី​សប្តាហ៍​មុន​។​

​បំណុល​ថ្មី​នេះ​នឹង​ជួយ​ជា​ថវិកា​សម្រាប់​វិធានការ​ផ្តល់ជំនួយ​សង្គ្រោះ​បន្ទាន់​សំដៅ​ដល់​អ្នក​ដែល​រងគ្រោះ​ខ្លាំង​បំផុត​ដោយសារ​រលក​រាតត្បាត​នាពេល​បច្ចុប្បន្ន​។​

​នេះ គឺជា​ច្បាប់​ទី ២ ដែល​ត្រូវ​បានអនុម័ត​ដើម្បី​ដោះស្រាយ​ជាមួយ​បញ្ហា​ជំងឺ​កូ​វីដ​-១៩ បន្ទាប់ពី​អនុក្រឹត្យ​ខ្ចីប្រាក់​ចំនួន ១​ទ្រី​លាន​បាត​កាលពី​ឆ្នាំមុន​។​

​ក្រុមប្រឹក្សា​សេដ្ឋកិច្ច និង​សង្គមជាតិ (NESDC) បាន​និយាយថា សេដ្ឋកិច្ច​ថៃ​បាន​ធ្លាក់ចុះ ២,៦​ភាគរយ​ពីមួយ​ឆ្នាំទៅ​មួយឆ្នាំ​នៅក្នុង​ត្រីមាស​ទី ១ នៃ​ឆ្នាំនេះ​។​

​ក្រុមប្រឹក្សា​នេះ​ក៏បាន​បន្ទាប​ការ​ព្យាករ​កំណើនសេដ្ឋកិច្ច​រប​ស់​ខ្លួន​ជា​លើក​ទី ២ ផងដែរ​ពី​ចំនួន ២,៥ ទៅ ៣,៥​ភាគរយ​កាល​ពីមុនមក​នៅត្រឹម ១,៥ ទៅ ២,៥​ភាគរយ​៕ (​ប្រភព VNA បកប្រែ​ដោយ​លោក យា ចិន្តា​ខន្តី​) 

(សូមអានបន្ត)

សប្បុរសជន ផ្តល់សម្ភារ និងថវិកា ជូនសាខាកាកបាទក្រហមកម្ពុជាខេត្តកណ្ដាល

 

(កណ្ដាល): ថ្ងៃទី២៦ ខែឧសភា ឆ្នាំ២០២១ នៅថ្ងៃ១៤កើត ខែជេស្ឋ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃអង្គារ ទី២៥ ខែឧសភា ឆ្នាំ២០២១ ឯកឧត្តម គង់ សោភ័ណ្ឌ អភិបាលខេត្ត កណ្តាល និង ជាប្រធានគណៈកម្មាធិការសាខាកាកបាទក្រហមកម្ពុជាខេត្ត បានអញ្ជើញ ទទួលថវិកា និងសម្ភារមួយចំនួន ពីលោកជំទាវឧកញ៉ា អ៊ាន សៀវម៉ី និង នាយកកំពង់ចម្លងភ្នំពេញ-អរិយក្សត្រ ក្នុងគោលបំណងចូលរួមចំណែកទ្រទ្រង់ដល់សកម្មភាពមនុស្សធម៌ពិសេសក្នុងខួបលើកទី១៥៨ ទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ឆ្នាំ២០២១ ក្រោមប្រធានបទ " ទាំងអស់គ្នារួមគ្នាជាមួយកាកបាទក្រហមកម្ពុជា ប្រយុទ្ធជំងឺកូវីដ-១៩ និងកសាងភាពធន់របស់សង្គមជាតិ " ។

ឯកឧត្តម គង់ សោភ័ណ្ឌ អភិបាលខេត្តកណ្តាល និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត បានថ្លែងអំណរគុណដល់លោកជំទាវឧកញ៉ា អ៊ាន សៀវម៉ី និង នាយកកំពង់ចម្លងភ្នំពេញ-អរិយក្សត្រ ដែលបានបរិច្ចាគនូវទ្រព្យសម្បត្តិផ្ទាល់ខ្លួន ដើម្បីរួមចំណែកជាមួយសកម្មភាពមនុស្សធម៌ របស់សាខាកាកបាទក្រហមកម្ពុជាខេត្តកណ្ដាល នៅពេលនេះ។

ឯកឧត្តម បានបន្តថា ថវិកា និងសម្ភារដែលបានផ្ដល់ជូននៅពេលនេះ គឺពិតជាមានតម្លៃ និងឆ្លើយតបបានទាន់ពេលវេលា ក្នុងកាលៈទេសៈដែលខេត្តកណ្ដាល កំពុងប្រយុទ្ធប្រឆាំងនឹងជំងឺកូវីដ-១៩ ដែលបានរីករាលដាលនៅទូទាំងខេត្តកណ្ដាល ហើយតំបន់មួយចំនួន ត្រូវបានសម្រេចបិទខ្ទប់ ដោយមិនអនុញ្ញាតឱ្យប្រជាពលរដ្ឋ ចេញពីផ្ទះ និង បន្លាស់ទីពីផ្ទះមួយទៅផ្ទះមួយ ឬពីភូមិមួយទៅភូមិមួយឡើយ។ ដូច្នេះអំណោយទាំងអស់នេះ គឺពិតជាទាន់ពេលវេលា ក្នុងការជួយប្រជាពលរដ្ឋ ដែលកំពុងប្រឈមទៅនឹងការខ្វះស្បៀងអាហារផងដែរ។

ថវិកា និងសម្ភារ ដែលសប្បុរសជននាំយកជូនសាខាកាកបាទក្រហមខេត្តកណ្ដាលរួមមាន៖ លោកជំទាវឧកញ៉ា អ៊ាន សៀវម៉ី ផ្តល់ ថវិកាចំនួន ១ម៉ឺនដុល្លារអាម៉េរិក ម៉ាសចំនួន ៥០កេសធំ ស្ព្រៃសម្លាប់មេរោគ ចំនួន ១.០០០ដប ។ ដោយឡែកអំណោយរបស់នាយកកំពង់ចម្លងភ្នំពេញ-អរិយក្សត្រ ផ្តល់ថវិកាចំនួន ២០លានរៀល ៕  (ប្រភពៈរដ្ឋបាលខេត្តកណ្ដាល)

(សូមអានបន្ត)

អាស៊ាន និងចិនបង្កើនកិច្ចសហប្រតិបត្តិការសុខភាពសាធារណៈ និងលើកកម្ពស់ការកសាង សហគមន៍សុខភាពសម្រាប់ទាំងអស់គ្នា

(ភ្នំពេញ​):ថ្ងៃទី ២៦ ខែឧសភា ឆ្នាំ ២០២១សន្និសីទ​ស្តីពី​កិច្ចសហប្រតិបត្តិការ​សុខ​ភាព​សាធារណៈ​រវាង​អាស៊ាន - ចិន ដែល​បានរៀបចំ​រួមគ្នា​ដោយ​មជ្ឈមណ្ឌល​អាស៊ាន - ចិន (ACC) ស្ថានទូត​សាធារណរដ្ឋ​ឥណ្ឌូណេស៊ី​ប្រចាំ​នៅ​ប្រទេស​ចិន និង​រដ្ឋាភិបាល​ប្រជាជន​ទីក្រុង Xuzhou ត្រូវបាន​រៀបចំឡើង​នៅ​ទីក្រុង Xuzhou នៃ​ខេត្ត Jiangsu នៅ​ភាគ​ខាងកើត​ប្រទេស​ចិន​កាលពី​ថ្ងៃទី ២១ ខែឧសភា​។ បណ្តា​អ្នកតំណាង​មកពី​ប្រទេស និង​អង្គការ​អន្តរជាតិ​ចំនួន ២០ បាន​ចូលរួម​នៅក្នុង​ព្រឹត្តិការណ៍​នេះ ដោយ​ចែករំលែក​ការយល់ដឹង​របស់​ពួកគេ​អំពី​វិធី​ដើម្បី​ធ្វើឱ្យ​កិច្ចសហប្រតិបត្តិការ​សុខ​ភាព​សាធារណៈ​កាន់តែ​ស៊ីជម្រៅ​រវាង​ប្រទេស​នៅ​អាស៊ាន និង​ចិន​។​

​ក្រោម​ប្រធានបទ «​កិច្ចសហប្រតិបត្តិការ និង​ការអភិវឌ្ឍ​ដើម្បី​អនាគត​ឈ្នះ​ឈ្នះ​» សន្និសីទ​នេះ​បាន​ពិភាក្សា​អំពី​វិធី​ពង្រឹង​កិច្ចសហប្រតិបត្តិការ​សុខ​ភាព​សាធារណៈ​រវាង​ចិន - អាស៊ាន​ក្នុង​វិស័យ​មួយចំនួន ដូចជា​វិស័យ​បង្ការ និង​ត្រួតពិនិត្យ​ជំងឺ ការបណ្តុះបណ្តាល​ទេពកោសល្យ បច្ចេកវិទ្យា​ព័ត៌មានវិទ្យា និង​បច្ចេកវិទ្យា​វេជ្ជសាស្ត្រ និង​ពាណិជ្ជកម្ម​ក្នុង​សេវាកម្ម​សុខភាព និង​សង្គម​។​

​ឆ្នាំនេះ គឺជា​ខួប​លើក​ទី ៣០ នៃ​ទំនាក់ទំនង​កិច្ចសន្ទនា​រវាង​អាស៊ាន - ចិន និង​ខួប​លើក​ទី ១០ នៃ​ការបង្កើត ACC​។ នៅ​ចំពោះមុខ​ការរីក​រាលដាល​នៃ​ជំងឺ​រាតត្បាត​កូ​វីដ​-១៩ ប្រទេស​ចិន និង​បណ្តា​ប្រទេស​នៅ​អាស៊ាន​បាននិងកំពុង​ពង្រឹង​កិច្ចសហប្រតិបត្តិការ​លើ​ការគ្រប់គ្រង និង​បង្ការ​ការ​រាតត្បាត ដែលនាំឱ្យ​ទំនាក់ទំនង​ទ្វេភាគី​ឈានដល់​កម្រិត​ខ្ពស់​មួយ​។​

​ទីក្រុង Xuzhou ជាការ​ភ្ជាប់​ដ៏​សំខាន់​សម្រាប់​សម្រាប់​គំនិត​ផ្តួចផ្តើម​ខ្សែក្រវាត់​មួយ និង​ផ្លូវ​មួយ ដែល​បាន​បង្កើត​ទំនាក់ទំនង​មិត្ត​ភាពជា​បន្តបន្ទាប់​ជាមួយ​បណ្តា​ខេត្ត​ក្រុង​មួយចំនួន​ក្នុងប្រទេស​អាស៊ាន​។ នៅក្នុង​ពិធី​បើក​ព្រឹត្តិការណ៍​នោះ អភិបាលរង​ទីក្រុង Xuzhou លោក Zhang Ke និង​អគ្គលេខាធិការ ACC លោក Chen Dehai បាន​ចុះហត្ថលេខា​រួមគ្នា​លើ​អនុស្សារណៈ​នៃ​កិច្ចសហប្រតិបត្តិការ​រ​វាង​រដ្ឋាភិបាល​ប្រជាជន​ទីក្រុង Xuzhou និង​មជ្ឈមណ្ឌល​អាស៊ាន - ចិន ដែលជា​សកម្មភាព​មួយ​សំដៅ​ពង្រឹង​ការផ្លាស់ប្តូរ និង​កិច្ចសហប្រតិបត្តិការ​រ​វាង​ភាគី​ទាំងពីរ​ក្នុង​វិស័យ​ពាក់ព័ន្ធ​នានា​៕ (​ប្រភព People's Daily បកប្រែ​ដោយ​លោក យា ចិន្តា​ខន្តី​) 

(សូមអានបន្ត)

អភិបាលខេត្តបន្ទាយមានជ័យ អំពាវនាវប្រជាពលរដ្ឋ បន្តសហការជាមួយអាជ្ញាធរសមត្ថកិច្ច គ្រូពេទ្យ ដើម្បីកាត់ផ្តាច់ ទប់ស្កាត់ការរីករាលដាលនៃជំងឺកូវីដ-១៩

បន្ទាយមានជ័យ : ថ្ងៃទី២៥ ខែឧសភា ឆ្នាំ២០២១ អភិបាលខេត្តបន្ទាយមានជ័យឯកឧត្តម អ៊ុំ រាត្រី បានធ្វើការអំពាវនាវដល់ប្រជាពលរដ្ឋ មានការសង្ស័យពាក់ព័ន្ធអ្នកមានវិជ្ជមានកូវីដ- ១៩ ត្រូវតែចូលរួមសហការជាមួយអាជ្ញាធរមានសមត្ថកិច្ច កងកម្លាំងគ្រូពេទ្យ ដើម្បីកាត់ផ្តាច់ ទប់ស្កាត់ការរីករាលដាលនៃជំងឺកូវីដ-១៩ និងត្រូវបន្តចូលរួមអនុវត្តន៍វិធានការ ៣កុំ និង៣ការ ពារ ឱ្យបានខ្ជាប់ខ្ជួន។

ការលើកឡើងបែបនេះរបស់ឯកឧត្តម អ៊ុំ រាត្រី បានបន្តធ្វើឡើងក្នុងឱកាសដឹកនាំក្រុម ការងារចុះពិនិត្យមើលទីតាំងបន្ថែម១ទៀត រៀបចំជាកន្លែងសម្រាកព្យាបាលអ្នកជំងឺកូវីដ-១៩ ក្នុងភូមិសាស្ត្រប៉ោយប៉ែត និងពិនិត្យមើលទីតាំងបិទខ្ទប់ ដែលត្រូវបានបើកឡើងវិញនៅមួយ ផ្នែក នៃសង្កាត់ផ្សារកណ្តាល ក៏ដូចជាចុះពិនិត្យមើលក្រុមគ្រូពេទ្យ ដែលកំពុងធ្វើការយ៉ាង សកម្មក្នុងដំណើរការយកសំណាកបងប្អូន ពាក់ព័ន្ធអ្នកមានវិជ្ជមានកូវីដ-១៩ នៅក្រុងប៉ោយ ប៉ែត កាលពីរសៀលថ្ងៃ១៣កើត ខែជេស្ឋ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃចន្ទ ទី២៤ ខែឧសភា ឆ្នាំ២០២១។

នៅទីនោះឯកឧត្តម បានក្រើនរម្លឹកដល់អាជ្ញាធរ កងកម្លាំងប្រដាប់អាវុធ ក្រុមគ្រូពេទ្យ ទាំងអស់ ដែលកំពុងបំពេញការងារយ៉ាងសកម្ម ទាំងថ្ងៃទាំងយប់ ក្នុងតំបន់ប៉ោយប៉ែតនេះ ត្រូវតែបន្តខិតខំរួមគ្នាដើម្បីស្វែងរកអ្នកពាក់ព័ន្ធទាំងអស់ ដើម្បីពិនិត្យសំណាកដាក់ឱ្យធ្វើចត្តា ឡីស័ក ។ ករណីរកឃើញលទ្ធផលវិជ្ជមាន បន្តព្យាបាលការពារទប់ស្កាត់ឱ្យបានការរីករាលនៃ ជំងឺកូវីដ-១៩ នៅភូមិសាស្ត្រក្រុងប៉ោយប៉ែត ខេត្តបន្ទាយមានជ័យ ឱ្យឆាប់បញ្ចប់នៅពេលខាង មុខនេះ ។

ឯកឧត្តម អភិបាលខេត្តបន្ទាយមានជ័យ ក៏បានអំពាវនាវយ៉ាងទទួច សូមឱ្យបងប្អូន ដែលមានពាក់ព័ន្ធទាំងអស់ ត្រូវផ្តល់ព័ត៌មានពិត រហ័សចូលរួមសហការជាមួយអាជ្ញាធរមាន សមត្ថកិច្ច ដើម្បីអនុវត្តន៍វិធានការឱ្យទទួលបានជោគជ័យ ក្នុងការប្រយុទ្ធទប់ស្កាត់ជំងឺដ៏កាច សាហាវនេះ។

អភិបាលក្រុងប៉ោយប៉ែតលោក គាត ហ៊ុល បានឱ្យដឹងថា ចាប់តាំងពីថ្ងៃទី២៣ខែមេសាឆ្នាំ២០២១មក នៅក្រុងប៉ោយប៉ែតមានការឆ្លងរីករាលដាលដ៏គំហុកជំងឺកូវីដ-១៩ “ព្រឹត្តិការណ៍សហគមន៍២០កុម្ភៈ” ។ អាជ្ញាធរ កងកម្លាំងប្រដាប់អាវុធ បានសហការជាមួយក្រុមគ្រូពេទ្យជួរ មុខ បានស្រាវជ្រាវរកអ្នកប៉ះពាល់ផ្ទាល់និងប្រយោល រហូតដល់ថ្ងៃទី២៤ ខែឧសភា ឆ្នាំ២០២១ នេះ បានយកសំណាកសរុប ១៤.២៣៧នាក់ ស្រី ៦.២៧២នាក់ និងបានរកឃើញវិជ្ជមានកូវីដ- ១៩ ចំនួន ១.៨៣៥នាក់ ស្រី៨១០នាក់។ ក្នុងនោះជនជាតិខ្មែរ ៩៣៤នាក់ ស្រី ៥០៦នាក់ និង ជនបរទេសចំនួន ៩០១នាក់ ស្រី៣០៤នាក់។ មកទល់ពេលនេះអ្នកជាសះស្បើយមានចំនួន៦៦០នាក់ ស្រី ២៧៥នាក់ ស្លាប់៦នាក់ ស្រី៤នាក់ ក្នុងនោះមានជនបរទេស(ថៃ)១នាក់។

លោក គាត ហ៊ុល ឱ្យដឹងទៀតថា បច្ចុប្បន្នរដ្ឋបាលក្រុងសហការជាមួយរដ្ឋបាលខេត្ត មន្ទីរសុខាភិបាលខេត្ត បានរៀបចំមណ្ឌលព្យាបាល និងមន្ទីរពេទ្យថែទាំ ព្យាបាលអ្នកជំងឺកូវីដ-១៩ ចំនួន៩កន្លែង ដែលមានអ្នកជំងឺកំពុងសម្រាកព្យាបាលចំនួន ១.១៧៥នាក់ ស្រី៥៣៥នាក់។ ដើម្បីទប់ស្កាត់ការឆ្លងរីករាលដាលជំងឺកូវីដ-១៩ កន្លងមក និងបច្ចុប្បន្ន រដ្ឋបាលខេត្តបាន ចេញសេចក្តីសម្រេចធ្វើការកំណត់ភូមិសាស្ត្រមួយចំនួន ជាតំបន់ក្រហម បិទខ្ទប់តំបន់មួយ ចំនួនជាបណ្តោះអាសន្ន។

អភិបាលក្រុងប៉ោយប៉ែតបានបន្ថែមថា ដោយមានការយកចិត្តទុកដាក់ពីប្រមុខរាជ រដ្ឋាភិបាល និងក្រសួងសុខាភិបាល ប្រជាពលរដ្ឋក្នុងក្រុងប៉ោយប៉ែត បានទទួលការចាក់វ៉ាក់សាំងបង្ការជំងឺកូវីដ-១៩ បានចំនួន ៤.២៦៥នាក់ នៅសល់អ្នកដែលមិនទាន់បានចាក់ចំនួន៦៣.៨០៩នាក់ទៀត ៕

(សូមអានបន្ត)

អាជ្ញាធរព្រះវិហារ ដំណើរការជួសជុលជណ្ដើរបុរាណខាងជើង នៃប្រាសាទព្រះវិហារ នៅថ្នាក់ទី២

ភ្នំពេញ ៖ ថ្ងៃទី២៥ ខែឧសភា ឆ្នាំ២០២១​ នៅថ្ងៃ១៣កើត ខែជេស្ឋ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃចន្ទ ទី២៥ ខែឧសភា ឆ្នាំ២០២១ ក្រុមអ្នកអភិរក្ស និង ក្រុមការងារបច្ចេក ទេសរបស់គម្រោងអភិរក្ស និង ជួសជុលជណ្ដើរបុរាណខាងជើង នៃប្រាសាទព្រះវិហារ នាយកដ្ឋានរមណីយដ្ឋាន និងបុរាណវិទ្យានៃអាជ្ញាធរជាតិព្រះវិហារ បាននិងកំពុងបន្ដអភិរក្ស និងជួសជុលជណ្ដើរបុរាណ នៅថ្នាក់ទី២យ៉ាងមមាញឹក។

ការងារជួសជុលជណ្ដើរបុរាណខាងជើង នៃប្រាសាទព្រះវិហារ រួមមាន ការរៀបចំការដ្ឋានថ្មីនៅថ្នាក់ទី២ ការចុះលេខសម្គាល់ និងធ្វើបញ្ជីសារពើភណ្ឌឱ្យថ្មនីមួយៗ ទៅតាមស្រទាប់នីមួយៗ ការរុះរើថ្មធ្នាក់ដៃទាំងសងខាង និងកាំជណ្ដើរ ការសម្រង់ប្លង់រួមនៅថ្នាក់ទី២ ទាំងធ្នាក់ដៃខាងកើត ខាងលិច និងកាំជណ្ដើរ ការពិសោធន៍គ្រឹះដោយប្រើប្រាស់ឧបករណ៍ DCPT (Dynamic Cone Penetration Test) មុនពេលជួសជុល ដើម្បីលទ្ធភាពទ្រទ្រង់របស់គ្រឹះជណ្ដើរ ការព្យាបាលថ្មប្រេះធ្នាក់ដៃខាងកើតបានចំនួន ៣ដុំ ធ្នាក់ដៃខាងលិចបានចំនួន ៤ដុំ និងថ្មកាំជណ្ដើរបានចំនួន ១ដុំ ដោយស្វានតដាក់ស្នូលជាមួយកាវញី-ឈ្មោល ដើម្បីរក្សាគុណភាពថ្មឱ្យមានភាពរឹងមាំ បានប្រសើរឡើងវិញ។

ការរៀបចំថ្មធ្នាក់ដៃខាងកើតចូលទីតាំងដើមវិញ និងបង្ហាប់គ្រឹះ ការពិសោធន៍គ្រឹះនៅធ្នាក់ដៃខាងកើតក្រោយពេលជួសជុល ដោយប្រើប្រាស់ DCPT (Dynamic Cone Penetration Test) នៅធ្នាក់ដៃ ក្រោយពេលជួសជុល មកប្រៀបធៀបគ្នា ដើម្បីឱ្យដឹងពីកម្រិតភាពរឹងមាំក្រោយពីបង្ហាប់គ្រឹះរួច។

គួររម្លឹកថា កាលពីថ្ងៃទី២៨ ខែមេសា ឆ្នាំ២០២១ អាជ្ញាធរជាតិព្រះវិហារ បានរៀបចំកិច្ចប្រជុំបច្ចេកទេសជាមួយ Ad hoc Experts ICC-Preah Vihear ដឹកនាំដោយឯកឧត្តម គង់ ពុទ្ធិការ អគ្គនាយកអាជ្ញាធរជាតិព្រះវិហារ និងសាស្ត្រាចារ្យ Azedine Bechaouch លេខាអចិន្ត្រៃយ៍គណៈកម្មការ ICC-Preah Vihear និងមានការចូលរួមពីអ្នកជំនាញការអន្តរជាតិ អាដហុក ចំនួន៤រូប ព្រមទាំងប្រធាននាយកដ្ឋាន អនុប្រធាននាយកដ្ឋាន និងមន្រ្ដីជំនាញតាមនាយកដ្ឋា ននីមួយៗ ដើម្បីពិភាក្សា និងស្នើសុំអនុសាសន៍ លើការអនុវត្តកម្មវិធីអភិរក្សប្រាសាទ នៅរមណីយដ្ឋានប្រាសាទព្រះវិហារ ។ ក្នុងនោះក៏មានជួសជុលកាំជណ្ដើរបុរាណខាងជើង នៃប្រាសាទព្រះវិហារ នៅថ្នាក់ទី២ផងដែរ៕

 (ប្រភពៈអាជ្ញាធរព្រះវិហារ)

(សូមអានបន្ត)

រដ្ឋបាលខេត្តព្រៃវែង បង្ហាញអត្តសញ្ញាណអ្នកឆ្លងជំងឺកូវីដ១៩ ចំនួន២០នាក់បន្ថែមទៀត

(ព្រៃវែង)៖ រដ្ឋបាលខេត្តព្រៃវែង នៅថ្ងៃទី២៤ ខែឧសភា ឆ្នាំ២០២១នេះ បានបង្ហាញអត្តសញ្ញាណអ្នកវិជ្ជមានកូវីដ១៩ ចំនួន២០នាក់បន្ថែមទៀត ដែលទើបរកឃើញឆ្លងថ្មី តាមរយៈការធ្វើតេស្តរហ័ស (Rapid Test)។

អ្នកឆ្លងកូវីដ១៩ ថ្មីទាំង២០នាក់ មាននៅមូលដ្ឋានក្នុងក្រុង/ស្រុកចំនួន៨ របស់ខេត្ត មានដូចជា៖ ស្រុកពាមរក៍ ចំនួន៨នាក់, ស្រុកបាភ្នំ ចំនួន១នាក់, ស្រុកព្រះស្តេច ចំនួន២នាក់, ស្រុកពារាំង ចំនួន២នាក់, ស្រុកស្វាយអន្ទរ ចំនួន២នាក់, ស្រុកកញ្ជៀច ចំនួន១នាក់, ស្រុកស៉ីធរកណ្តាល ចំនួន៣នាក់ និងក្រុងព្រៃវែងចំនួន១នាក់។

បច្ចុប្បន្នអ្នកវិជ្ជមានជំងឺកូវីដ១៩ ទាំង២០នាក់ កំពុងសម្រាកព្យាបាលនៅមន្ទីរពេទ្យបង្អែកស្រុករបស់ពួកគេនិមួយៗ។ ចំពោះប្រវត្តិធ្វើដំណើរ និងអត្តសញ្ញាណរបស់អ្នកវិជ្ជមានកូវីដ១៩ ទាំង២០នាក់ ត្រូវបានបង្ហាញនៅលើរូបថតរបស់ពួកគាត់។

ជាមួយគ្នានេះ រដ្ឋបាលខេត្តអំពាវនាវ ដល់អ្នកដែលបានប្រាស្រ័យទាក់ទង ប៉ះពាល់ដោយផ្ទាល់ ឬប្រយោល ជាមួយបុគ្គលវិជ្ជមានកូវីដ១៩ទាំង២០នាក់ សូមដាក់ខ្លួនដាច់ដោយឡែក តាមដានសុខភាពរយៈពេល១៤ថ្ងៃ និងរាយការណ៍មកអាជ្ញាធរ ដើម្បីយកសំណាក និងធ្វើចត្តាឡីស័ក (៣ការពារ ៣កុំ)៕

(សូមអានបន្ត)